बौद्ध संगीतकार किरण शाक्य

 दुर्गा मानन्धर

विक्रम संवत् १९९३ सालय् यलया ओकुबहाः त्वालय् जन्म जुयादीम्ह नांजाःम्ह बौद्ध संगीतकार किरण शाक्यं थःगु जीवनकालया ८० दँ धइथें सांगीतिक क्षेत्रय् पानादीगु दु । झिंनिदँया नच्चागु वैंशनिसें हे थःगु त्वालय् जक मखु, येँ, यल, ख्वप, स्वनिगलं पिने बुद्धवल, बुद्धगया, पोखरा, पाल्पा, तानसेनलिसें गां गामय् व भारतया वाराणसीइ तकं वनाः भजन प्रस्तुत यानाः ज्ञानमाला भजनया प्रचार प्रसार याना वयाच्वंगु धइगु तसकं च्वछायेबह जू ।

किरण शाक्य स्कुलय् आखः ब्वनाच्वँच्वं हे संगीत ख्यलय् दुविना बिल । गुकिं यानाः एसएलसी परीक्षा हे निक्वःतक बीमाल । मछिन्द्र इन्ष्टिच्युट यलपाखें एसएलसी पास यायेधुंकाः सरस्वती क्याम्पसय् अध्ययन यानाच्वंगु इलय् पुतलीसतकय् च्वंगु नेपाःया हे न्हापांगु संगीत महाविद्यालयया प्रिन्सिपल गुरु यज्ञराज शर्मा व उस्ताद बुद्धरत्न तुलाधरपाखें करिब निदँ तक संगीत अध्ययन यानादिल । अथे हे संगीत विद्यालयया वरिष्ठ संगीतकार दीपक जंगम, हिरण्य भोजपुरी, गणेश रसिक, तारावीर सिं तुलाधरनाप नं अध्ययन यायां ३३ दँ तक राष्ट्र बैंकया अधिकृत पदय् च्वनाः नं संगीत क्षेत्रय् थःत पाना वयाच्वनादिल । वय्कःया थ्व लगनशीलता खनाः तसकं लय्ताः ।

रेडियो नेपालय् नेपालभाषाया म्येँ हालेगु इच्छाया कारणं स्वर परीक्षण (भ्वाइस टेष्ट) पास यााः ‘जीवन दबू’ ज्याझ्वलय् खुपु न्हय्पुति म्येँ नं हालादिल । व ताकाय् प्रत्यक्ष हे म्येँ हाला प्रचार यायेमाःगुलिं तसकं थाकुगु अनुभव जूगु वय्कलं न्यंकादिल । ‘लसिकलं न्यासि मिखा, गुलि जक बांलाः मैचा’ बोलया लोकंह्वाःगु म्येँ न्हापांखुसी रेडियो नेपालं थ्वयेका हःगु इलय् थःगु जीवनय् व थें न्ह्यइपुगु ई गबलें नं मवःगु व उगु ईयात थम्हं गबलें नं ल्वःमंके मफइगु नं वय्कलं कनादी ।

वय्कः छम्ह निर्देशकया नापनापं ऐतिहासिक बौद्ध संकिपा ‘चाण्डालिका’, ‘अंगुलिमाल’, ‘विश्वन्तरया मचादान’, ‘सिद्धार्थया गृहत्याग’ थेंज्याःगु पूर्णांङ्की नाटकय् नं संगीत बियादीगु दु । अथे हे रेडियो नेपालपाखें प्रशारण जूगु ‘उद्धार’ नांया धारावाहिक रेडियो नाटकय् नं वय्कलं संगीत बियादीगु दु ।

थुकथं हे नांजाःम्ह सिने कलाकार रेखा थापालिसें प्रेमलक्ष्मी तुलाधर, धर्मकीर्ति, रिमा गुरुङ, रेखा शाह, निशा देसार, सिर्जना श्रेष्ठ, हिसिला महर्जन (राजमति), रत्नशोभा महर्जन, दीपाश्री पल्लवी ढकाल, सुमन कपाली, नलिना चित्रकार, अञ्जान शाक्य, संगीता शाक्य, कोमल वली, सपना श्री, रमना श्रेष्ठ, लुना शाक्य, सरिता महर्जन, सरिता शाहीलिसें पुलांपिं नांजाःपिं म्येँ हालामिपिं पे्रमध्वज प्रधान, लोचन भट्टराई, मीरा राणा, सत्यनारायण राजभण्डारी, मदनकृष्ण श्रेष्ठ, हरिवंश आचार्य, मिलन चखुं, द्वारिकालाल जोशी, भृगुराम श्रेष्ठ, नगिना जोशी, इन्दिरा ढकाल, कविता जोशी, देवीका वन्दना, रोजी श्रेष्ठ, रेजिना बुद्धाचार्य, प्रियंका देसार, उर्मिला तुलाधर, ललिता भोजपुरी थेंज्याःपिंत नं थःगु संगीतय् वय्कलं म्येँ हायेकादीगु दु ।

स्वसःपु स्वयां अप्वः बुद्ध भजन, म्येँय् वय्कलं लय् तयादीगु दुसा म्येँ रचना नं यानादीगु दु । अथे हे करिब नीखुगू म्येँचाः, सीडी नं वय्कःया पिहां वयेधुंकूगु दु । वय्कःया म्येँ व म्येँचाः नेपाःया दक्वं धइथें एफएम, टेलिभिजनं न्हियान्हिथं धइथें प्रशारण याना वयाच्वंगु दु । भजनय् जक वय्कलं न्यासः स्वयां अप्वः म्येँय् लय् तयादीधुंकूगु दु ।

किरण शाक्यया बौद्ध संगीतपाखे क्वसाःगु नुगः व वय्कलं बियादीगु योगदानयात कयाः आपालं संघसंस्थां हनेज्या नं यायेधुंकूगु दु । वय्कःयात सोम स्मृति राष्ट्रिय पुरस्कार–२०२७, धर्मशिला बुद्ध विहार पोखराया स्वर्ण जयन्तीया लसताय् सम्मान, राष्ट्रिय सरोकार संस्था नागरिक स्वर्ण सम्मान, वज्र फाउण्डेसनपाखें सम्मान, वज्र बौद्ध भवन शिरोमणि सम्मान, शान्ति व विकास अभियान नेपाल सिरपाः, विश्वन्तर संगीत सिरपाः, राष्ट्रिय क्लब अफ ललितपुर, बहुप्रतिभाशाली व्यक्तित्व, प्रज्ञानन्द स्मृति सिरपाः, अमेरिका होण्डुरस सम्मान व सिरपाः, सानेपा ज्ञानमाला भजन अन्तर्गत पूर्व अधिराजकुमारी हिमानी शाहपाखें सम्मान, स्वयम्भू ज्ञानमाला भजनपाखें रत्नवत सिरपाः व बुद्धि कम्युनिकेशन सेन्टरपाखें नं पुरस्कार प्रदान यायेधुंकूगु दु ।

जागिरया सिलसिलाय् विराटनगरया ताराबारी, केराबारी थेंज्याःगु थेंज्याःगु घनघोर अन्धकार जंगलय् फसे जुल । अथे खःसां विचलित जुयामदीम्ह वय्कलं संगीतया हे कारणं थःगु जीवनरक्षा जूगु तायेकादी । थःगु जीवनया अन्तिम इलय् छुं यंकेगु दुसा संगीत प्रतिभा हे यंकेगु वय्कलं थःगु मनसुवाः जूगु खँ कनादिल ।

सम्बन्धित बुखँ

LEAVE YOUR COMMENTS