भ्रष्टाचारया मुद्दाय् हदम्यादबारे सरकार लिचिल
येँ (नेपालभाषा टाइम्स)÷ भ्रष्टाचारमुद्दाय् न्यादँ तकया जक हदम्याद तयेगु खँय् प्यखेरं विरोध जुइवं सरकार छुं भचा लिचिउगु दु । भ्रष्टाचार निवारण ऐन, २०५९ यात संशोधन यायेत दयेकूगु विधेयकय् न्यादँया हदम्याद तयातःगु खःसां उकियात कयाः सत्तापक्ष, प्रतिपक्ष नापं मानव अधिकार आयोगं तकं चिउताः प्वंकेवं सरकार हदम्याद अप्वयेकाः झिदँ यायेगु तयारी यानाच्वंगु खँ सीदुगु दु ।
थ्व विधेयकयात कयाः प्रतिनिधि– सभाया राज्य व्यवस्था तथा सुशासन समितिइ दफावार सहलह जुयाच्वंगु दु । थुकी कांग्रेस, एमाले व माओवादीया छुं नेतातय्सं न्यादँया हदम्याद अप्वयेकाः झिदँ यायेमाःगु सुझाव बियाच्वंगु दुसा पीम्ह स्वयां अप्वः सांसदतय्सं हदम्याद हे तये मजिउ धकाः संशोधन प्रस्ताव तःगु दु । न्यादँया हदम्याद तल धाःसा तःधंगु भ्रष्टाचारया मुद्दाय् अनुसन्धान हे जुइ मखु धासें पीम्ह सांसदं प्रस्तावित विधेयकयात कयाः संशोधन तःगु खः । उमिसं हदम्याद चीकेमाःगु माग नं यानाच्वंगु दु । समितिइ दलगत निर्णय मवःसां शीर्ष तहलय् जूगु सहलहय् धाःसा छुं क्वमिलु जुइ माली धकाः खँ जूगु खँ सूत्रं धाःगु दु ।
थ्व स्वयां न्ह्यः राष्ट्रियसभाया विधायन व्यवस्था समितिइ नं भ्रष्टाचार निवारण ऐनय् हदम्यादया बारे विरोध जूगु खःसा एमालेया बहुमत सांसदतय्सं हदम्याद तयेमाःगु व अनुसन्धान मजुइगु धायेवं हदम्याद तयाः पारित याःगु खः ।
राष्ट्रिय मानव अधिकार आयोगं राज्य व्यवस्था समितिइ पौ च्वयाः भ्रष्टाचार मुद्दाय् हदम्याद मतयेत सुझाव बिउगु दु । आयोगं भ्रष्टाचारजन्य कसुरय् हदम्यादया आधारय् उन्मुक्ति बीकथं ऐन संशोधन यायेत्यंगु खँय् थःपिनि ध्यानाकर्षण जूगु खँ नं धाःगु दु ।
\समितिया सभापति रामहरि खतिवडां समितिइ नकतिनि जक दफावार सलहल जूगु व हदम्याद गुलि तयेगु धइगु बारे आः हे निर्णय मजूगु खँ धयादीगु दु । वय्कलं थः व्यक्तिगत रुपं हदम्यादया विपक्षय् दुगु व भ्रष्टाचारय् गुगुं नं कथंया हदम्याद तयेमजिउ धइगु पक्षय् थः दुगुलिं समितिइ नं थ्वहे खँ तयागु दाबी यानादीगु दु ।
थ्व स्वयां न्ह्यः प्रधानमन्त्री केपी शर्मा ओलीं नं भ्रष्टाचारया मुद्दाय् हदम्यादया निर्णय सरकारं मखुसें सांसदतय्सं दाबी याइगु खँ धयादीगु खः । वय्कलं वंगु बिहीवाः प्रतिनिधिसभाया बैठक लिपा सञ्चारकर्मीत लिसे खँ ल्हासें भ्रष्टाचारय् न्यादँया हदम्याद तयेगु वा मतयेगु धइगु निर्णय सरकारं मखुसें सांसदतय्सं याइ धयादीगु खः ।
LEAVE YOUR COMMENTS