वरिष्ठ मचा साहित्यकार शान्तदासया लुमन्तिइ मचा साहित्य धेंधेंबल्लाः

येँ(नेपालभाषा टाइम्स)- नांजाःम्ह व वरिष्ठ मचा साहित्यकार शान्तदास मानन्धरया लुमन्तिइ ‘मचा साहित्य धेंधेंबल्लाः कासा’ कासाय् उत्कृष्ट जूपिं शनिवाः जूगु छगू ज्याझ्वःया दथुइ सिरपाः लःल्हाःगु दु । येँ महानगरपालिका २३ वडाया ग्वसालय् महानगरव्यापी साहित्य धेंधेंबल्लाः जूगु खः ।

कासाय् उत्कृष्ट ब्वँमिपिंत मूपाहां येँ महानगरपालिकाया उपप्रमुख सुनिता डंगोलं दसिपौ लःल्हानादीगु खःसा २३ वडाअध्यक्ष मचाराजा महर्जनं दां सिरपाः लःल्हानादीगु खः । अथे हे निर्णायकमण्डलया प्रमुख रमेशकाजी स्थापितं खादा क्वखायेकादीगु खः ।

येँ महानगरपालिका २३ वडाया पुलांम्ह वडाअध्यक्ष तकं जुयादीम्ह वरिष्ठ मचा साहित्यकार मानन्धरया लुमन्तिइ जूगु येँ महानगरव्यापी मचा साहित्य धेंधेंबल्लाः कासाय् महानगर दुनेया सामुदायिक व निजी विद्यालयया ५० गू स्वयां अप्वः ब्वनेकुथिया ४०० स्वयां अप्वः ब्वँमिपिंसं ब्वति काःगु खः ।

तगिं ६ व ७ व तगिं ८ व ९ यानाः निगू पुचलय् नेपालभाषा व खस नेपाली भासं निगू निगू शीर्षकय् च्वखँ व चिनाखँ विधाय् उगु कासा जूगु खः । कासाय् ८ व ९ तगिंया समूहया च्वखँ कासाय् श्रेया पराजुली (फ्युचल स्टार इंग्लिश सेकेन्डरी स्कुल, तगिं ८) न्हाप, प्रकृति चौहान (विजेश्वरी ज्ञानमन्दिर सैनिक महाविद्यालय, तगिं ९) लिउ, सम्पदा थापा (श्री रत्नराज्य मावि, तगिं ८) लिउ व कजना श्रेष्ठ (जगतसुन्दर ब्वनेकुथि, तगिं ८) हःपाः सिरपाः त्याकादीगु खः ।

थुगु हे समूहय् चिनाखँ विधाय् सद्भाव ज्ञवाली (ज्ञानोदय मा.वि, ८) न्हाप, अञ्जली गुप्ता अनिश विष्ट (तगिं ९) लिउ, (श्री महांकाल माविं, ९) लियांलिउ सविना न्यौपाने (शान्ति निकुञ्ज मा.वि, ९) हःपाः सिरपाः त्याकल ।

तगिं ६ व ७ या समूहय् च्वखँ विधाय् सपना श्रेष्ठ (श्री महांकाल मा.वि., ७) न्हाप, आएशा खातुन (नेपाल युवक स्कुल, ६) लिउ, करुणा नेपाल (कन्या मन्दिर मा. वि., ७) लियांलिउ व युवराज शाह (जनकल्याण मा.वि., ६) हःपाः सिरपाः त्याकाल । अथे हे चिनाखँ विधाय् निभा श्रेष्ठ (जगतसुन्दर ब्वनेकुथि, ६) न्हाप, हिरा कुँवर (रत्नराज्य मा.वि., ७) लिउ, बिल्किस खातुन (कंकेश्वरी आधारभूत विद्यालय, ७) लियांलिउ व सुष्मा माझी (शान्ति निकुञ्ज मा.वि., ६) हःपाः सिरपाः त्याकेत ताःलाःगु खः ।

कासाय् न्हापयात झिद्वः, लिउयात न्हय्द्वः, लियांलिउयात न्याद्वः व हःपाःयात झिंन्यासः तका दां सिरपाःलिसें दसिपौ लःल्हाःगु खः । ज्याझ्वलय् उत्कृष्ट जुयादीपिं सकलें ब्वँमिपिंसं थःथःगु रचना नं पाठ याःगु खः ।

वडाअध्यक्ष मचाराजा महर्जनया सभापतित्वय् जूगु ज्याझ्वलय् २३ वडाया निमित्त सचिव रञ्जु श्रेष्ठं लसकुस यानादीगु खःसा वडा सदस्यलिसें ज्याझ्वःया कजि सुरेश मानन्धरं कासाया बारे जानकारी बियादीगु खः । ज्याझ्वलय् निर्णायकमण्डलयण प्रमुख रमेशकाजी स्थापितं निर्णय प्रक्रियाया बारे जानकारी बियादिसें सिरपाः त्याकादीपिं ब्वँमिपिनिगु नां घोषणा यानादीगु खःसा निर्णायकमण्डलया दुजः पूर्णिमा डंगोल शाक्यं वरिष्ठ मचा साहित्यकार मानन्धरया जीवनी बारे कनादीगु खः ।