अन्तरिक्ष पर्यटनय् न्हापांगु पलाः

अन्तरिक्षय् चाःहिउ वनेत पियाच्वंपिं सर्वसाधारणं आः याकनं हे चाःहिउ वनेखनीगु सम्भावना ब्वलंगु दु । अन्तरिक्षय् चाःहिइके यंकेगु निंतिं ज्या यानाच्वंगु ‘स्पेस एक्स’ नांयागु कम्पनीं नकतिनि हे जक छगः रकेटया सफल परीक्षण याःगु दु । ‘स्पेस एक्सं’ अमेरिकाया फ्लोरिडाय् च्वंगु केनेडी स्पेस सेन्टरं थुगु रकेट परीक्षण याःगु खः ।

थ्व रकेट मनूतय्त अन्तरिक्षय् चाःहिके यंकेगु ताः तयाः तयार यानाच्वंगु खः ।‘स्पेस एक्सं’ परीक्षणया निंतिं फाल्कन ९ रकेटय् तयाः ड्रागन क्रू क्याप्सुल प्रक्षेपण याःगु खः । अन्तरिक्षय् पर्यटक यंकीबलय् थ्व ड्रागन क्रू क्याप्सुलय् यात्रीयात तयाः छ्वइगु खः । थ्व ड्रागन क्रू लञ्च याःगुया ११ मिनेट लिपा रकेटपाखें अलग जुयाः स्पेस स्टेशनपाखे न्ह्याः वनेवं परीक्षण सफल जूगु जानकारी बिउगु खः ।

थ्व ड्रागन क्रू अन्तर्राष्ट्रिय अन्तरिक्ष स्टेशनय् न्यान्हुतक च्वनाः थौैं पृथ्वीइ लिहां वयेत्यंगु दु ।परीक्षणया इलय् सुं मनूयात धाःसा रकेटय् तयाः मछ्वः, थुकी मनूया डमी जक तयाछ्वःगु खः । रकेटया सम्पूर्ण परीक्षण सफल जुल धाःसा अमेरिकाया अन्तरिक्ष केन्द्रं स्वीकृति बीगु जुइ । केन्द्रया स्वीकृति वल धाःसा अन्तरिक्षय् यात्रुतय्त यंकेगु निंतिं लँ चाली ।

कम्पनीया संस्थापक एलन मस्कं अन्तरिक्षय् व्यावसायिक पर्यटन न्ह्याकेगु लँय् थ्व न्हापांगु पलाः जूगु खँ धाःगु दु । परीक्षणया निंतिं ब्वयेकूगु रकेटय् छगू सेन्सर तयाछ्वःगु खः, गुकिं थ्व रकेटय् च्वनावनीम्ह मनुखं गज्याःगु परिस्थितिया सामना यायेमाली धयागु सीकेफइ । रकेटय् तयाछ्वःम्ह कृतिम अन्तरिक्ष यात्रीयात ‘रिपली’ नां बिउगु दु ।

‘रिपली’ अन्तरिक्ष सम्बन्धी हलिउड फिल्म एलियनया छम्ह पात्र खः ।एलन मस्कं अन्तरिक्षय् पर्यटकत यंकेगु ताःतया ‘स्पेस एक्स’ कम्पनी चायेकूगु खः । रकेट प्रक्षेपण यायेधुंकाः एलनं पत्रकार सम्मेलनय् धाःगु दु ‘रकेट प्रक्षेपण याःगु ई जिगु निंतिं तसकं तनावया ई जुल । जि भावनात्मक रुपं भचा तनावय् वल ।

सन् २००२ निसें थन तक वयेत झिंन्हय्दँ बीधुंकूगु दु ।’मस्कं अन्तरिक्ष पर्यटनया निंतिं अमेरिकी अन्तरिक्ष केन्द्र नासा नं सकारात्मक दुगु खँ धासें आः रकेटया पूवंक परीक्षण लिपा अन्तरिक्षय् वनेत ध्यबा पुलेफुपिं पर्यटकत मालेगु खँ धाःगु दु ।

सम्बन्धित बुखँ

LEAVE YOUR COMMENTS