‘हाम्रो पात्रो’ य् नेपालभाषा

येँ – मोबाइल एप्स ‘हाम्रो पात्रो’ य् आः नेपालभाषां नं समाचार ब्वने दइगु जूगु दु । हाम्रो पात्रोया संस्थापक लिसे प्रमुख कार्यकारी निर्देशक शंकर उप्रेतीं म्हिगः छगू सुचं जारी यासें नेपालभाषा लिसें आः भोजपुरी व मैथली भाय्यात नं हाम्रो पात्रोय् दुथ्याकागु जानकारी बियादीगु खः । नेपालभाषां भाय् हिलेत भाषासेवी अनिल स्थापितं ग्वाहालि यानादीगु खःसा आः थुकी मेमेगु भाय् नं दुथ्याकेगु ग्वसाः दु ।

थुकी नेपाल संवत् व झिंनिगू महिनाया नेवाः नां नं दुथ्याइ । लिपा थुकी नेपाल लिपियात नं दुथ्याकेगु कुतः यानाच्वनागु जानकारी नं भाजु उप्रेतीं बियादीगु दु । थुकथं वल ‘हाम्रो पात्रो’ ःशंकर उप्रेती झिदँ न्ह्यः अमेरिकाय् आखः ब्वनाच्वंगु इलय् नेपालय् हनीगु नखःचखः व तिथिमिति लुमंकेत तसकं थाकुगु जुयाच्वन ।

तर विदेशय् च्वनाः नेपाःया नखःचखः व परम्परा हने अःपुइमा धकाः हाम्रो पात्रो सुरु यानागु खँ वय्कलं कनादी । हाम्रो पात्रो डाउनलोड याःपिनिगु ल्याः आः ५० लाख थ्यंगु दु । आः वइगु न्हय्न्हु तक थीथी कथंया न्हय्गू फिचर छ्यलेगु खँ वय्कलं कनादीगु दु ।

थीथी भासं एप्स तयेगु सोच सन् २०१६ स वःगु खँ कँसें हाम्रो पात्रो डटकमया म्यानेजिङ डाइरेक्टर सन्तोष देवकोटां तर थीथी कारणं यानाः ज्या यायेत लिबाःगु खँ नेपालभाषा टाइम्सयात कनादिल ।

वय्कलं थीथी भासं एप्स तयेगु बारे जनस्तरं तःधंगु तिबः व सुझाव वःगुलिं थःपिं उत्साहित जूगु धासें मधेशपाखे वनेगु झ्वलय् स्थानीय जनतां थःपिनिगु भासं एप्स दयेके फत धाःसा अजिपिंसं तकं थःगु भासं याउँक चले याये फइ धकाः हौसला बिउगु खँ न्ह्यथँसें आः म्होतिं नं न्यागू खुगू भाय् निं एप्सय् दुथ्याकेगु कथं ज्या जुयाच्वंगु जानकारी वय्कलं बियादिल ।

सम्बन्धित बुखँ

LEAVE YOUR COMMENTS