स्वनिगःया तापक्रम शून्य थ्यन

येँ – स्वनिगःया न्यूनतम तापक्रम शून्यय् कुहां वःगु दु । मौसम पूर्वानुमान महाशाखां सोमवाः सुथय् ८ः४५ बजे याःगु रेकर्ड कथं स्वनिगःया तापक्रम ०.५ डिग्री सेल्सियस मापन याःगु खः ।

तापक्रम कुहां वयेगु क्रम जारी जुयाच्वंगुलिं ख्वाउँगु अझ नं अप्वइगु खँ मौसमविदं धाःगु दु । मौसमविद् समिर श्रेष्ठं प्राकृतिक कारणया लिसें जम्मु कास्मिरं नेपाःपाखे दुहां वःगु ख्वाउँगु फसं तापक्रम म्हो जूगु खँ कनादीगु दु । वय्कलं धयादी, ‘चिकुलाया इलय् ख्वाउँइगु प्राकृतिक कारण खः, तर देय्न्यंक ख्वाउँगु छक्वलं अप्वइगुया कारण कास्मिरं नेपाःपाखे वःगु ख्वाउँगु फय् हे खः ।’

स्वनिगःया तापक्रम निरन्तर कुहां वयाच्वंसां नं थुगु दँय् न्यूनतम तापक्रम माइनसय् कुहां वनीगु सम्भावना धाःसा मदुगु खँ वय्कलं कनादीगु दु । मौसमविद् श्रेष्ठया कथं तापक्रम गुलि तक थ्यनी धइगु अनुमान यायेत थाकुसां थुगुसी माइनसय् वनीगु सम्भावना धाःसा म्हो जक दु ।

थ्वहे दथुइ छुं न्हिया दुने स्वनिगः लगायत देय्न्यंकं वा वये फइगु खँ सीदुगु दु । तर वा वःसां नं तराई लागाय् धाःसा शीतलहर वइगु सम्भावना नं म्हो जक दुगु खँ धाःगु दु ।

सम्बन्धित बुखँ

LEAVE YOUR COMMENTS