उपसभामुख माग यासें कांग्रेसपाखें मुद्दा दायर

येँ – कांग्रेसं सभामुख व उपसभामुख बिस्कं बिस्कं दलया जुइमाः धासें अदालतय् रिट दायर याःगु दु । प्रदेश नं. ५ या प्रदेशसभा सदस्य रिना नेपाल विकं उच्च अदालत तुलसीपुरय् थ्व रिट तयादीगु खः । रिटय् प्रदेशया मुख्यमन्त्री शंकर पोखरेल, सभामुख पूर्णबहादुर घर्ति, उपसभामुख कृष्णी थारु व प्रदेशसभा सचिवालययात विपक्षी दयेकातःगु दु । अन कांग्रेस संसदीय दलया नेता बलदेव शर्मां सभामुख व उपसभामुख बिस्कं बिस्कं दलया जुइमाः धकाः तःक्वःमछि माग यानाः नं सुनुवाइ मजूगुलिं अदालत वनेमाःगु खँ कनादीगु दु । एमाले व माओवादी छगू पाटी जूगुलिं आः उपसभामुख पद थःपिंत बीमाः नेपाली कांग्रेसं केन्द्रय् नं दावी यानाच्वंगु दु । उकिया लागिं कांग्रेसं संघर्ष यायेगु खँ धाःगु दु ।