सुधार व सुविधालिसें स्वनिगःया सार्वजनिक यातायात

यात्रुत चकंगु व आरामदायी सिटय् च्वनाः थःगु गन्तव्यतक न्यंकः वनी । बसय् च्वीगु इलय् इमिसं सपूm नं ब्वने फइ । ‘फ्रि वाईफाई’ या नं सुविधा दुगुलिं इमिं निर्धक्क जुयाः इन्टरनेट चले यायां यात्रा यानाच्वनी । न्हूपिं यात्रुयात गन थ्यन वा आःया गन्तव्य गक खः धकाः न्यनाच्वनेमाः धइगु मदु, बसय् हे गुगुं थासय् थ्यनेवं थः हे जानकारी बीगु विद्युतीय प्रणाली दु ।

बसय् च्वनीगु इलय् ध्यबा पुलाः टिकट काइम्ह यात्रु कुहां वइगु इलय् व हे टिकट क्यनाः कुहां वइ । गुलिखे यात्रु धाःसा ‘ई टिकेटिङ’ पाखें थःके दुगु कार्ड प्रयोग यानाः भाडा पुली । ज्येष्ठ नागरिक, मिसा, अपांगता जूपिं सकलें आरक्षण सिटय् च्वं वा मच्वं स्वयेत सहचालक खटे जुइ ।
थ्व लिपांगु इलय् स्वनिगःया सार्वजनिक यातायातय् खने दुगु सुधारोन्मुख दृष्य खः ।

थौकन्हय् स्वनिगलय् चले जुइगु सार्वजनिक सवारी साधनमध्ये अप्वः थें सवारी साधनय् थज्याःगु सुविधा दु । वर्तमान सरकार वयेधुंकाः थज्याःगु सुविधा बिउगु खः ।अझ गुलिखे सवारी साधनय् च्वय् न्ह्यथनागु स्वयां अप्वः सुविधा दु । थगुने तक सुनां दकलय् अप्वः यात्रु तयाः अप्वः ध्यबा कमे यायेफु धइगुलिइ जक धेंधेंबल्लाः जुइगु याना वयाच्वंगुलिइ आः वयाः सुनां अप्वः सुविधा बियाः यात्रुयात आकर्षित याये फु धइगु शुरु जूगु यात्रुतय् धापू दु ।

वंगु बैशाख ४ गते सरकारं दँदँ न्ह्यवंनिसें कायम जुयाच्वंगु एकाधिकार चिइकाः यातायातया क्षेत्रय् सुधार हयाः सुविधासिहत न्हूपिं व्यवसायी थप यानाच्वंगु दु । सार्वजनिक यातायातय् चिचिग्वःगु सवारी साधन स्वउां सरकारं ततःग्वःगु सवारी (मास ट्रान्सपोर्टेशन) साधनय् वनेगु लक्ष्य काःगुयालिसें तग्वःगु व सुविधा सम्पन्न बस स्वनिगःया सतकय् थप जुजुं वयाच्वंगु खंके फइ ।

मूलपानीया ७५ दँ दुम्ह सोमबहादुर थापां सार्वजनिक यातायातय् विचाः मयानाकथंया हिउपाः वयाच्वंगु खने दुगु धयादिल । आरक्षित सिट व भाडाय् बीगु छ्यापनं यानाः ज्येष्ठ नागरिकयात सार्वजनिक सवारीइ अःपुका बिउगु वय्कःया अनुभव दु । न्हापा न्हापा थें बसय् ज्येष्ठ नागरिकया सिट खनेवं ‘जि च्वने’ धकाः दावी यायेमाःगु स्थिति मदु ।

चालक व सहचालकयात नं आरक्षित सिटय् सु च्वन धकाः चिउताः मदुगु वय्कःया अनुभव दु । आः धाःसा सहचालकं नकतिनियापिं सिटय् फ्यतुगु खन धाःसा वयात थनाः ज्येष्ठ नागरिकयात हे फ्यतुकेगु यानाच्वंगु दुसा मेखे आः थःपिंसं हे नं ‘थ्व सिट जिमिगु खः’ धकाः मेपिंत थनाः थः फ्यतुइ फइगु जूगु दु ।

भौतिक पूर्वाधार तथा यातायात मन्त्रालयं यातायात क्षेत्रय् दुगु एकाधिकार (सिन्डीकेट) कानूनी रुपं खारेज जूगु धइगु वर्तमान सरकार वयेधुंकाः यातायातया क्षेत्रय् उल्लेखनीय रुपं सुधार जूगु जिकिर याःगु दु । मन्त्रालयया प्रवक्ता शिवहरि सापकोटायाकथं दँदँ न्ह्यवंनिसें दयाच्वंगु सिन्डीकेट अन्त्यया निंतिं विभागपाखें १० गू निर्देशिका जारी जूगु दु ।

वंगु वालय् जक च्वंगु मन्त्रिपरिषद्या बैठकं यातायात प्राधिकरण ऐन, २०७५ या विधेयक तर्जुमा यायेत सैद्धान्तिक स्वीकृति बीगु निर्णय याःगु खः । नीतिगत रुपय् सुधार यानाः उकिया कार्यान्वयन नं नापनापं यंकागु वय्कलं कनादिल । ‘वय्कलं धयादिल, ‘सतक व यातायात सम्बन्धी नीति व ऐनत संशोधनया क्रमय् दु ।’

एकाधिकार कायम यानाः सवारी चले यानाच्वंपिं यातायात व्यवसायीयात सहकारी फर्म वा कम्पनीया रुपय् दर्ता जुयाः यातायात व्यवसाय नवीकरण यानाः जक संचालन यायेत कार्यविधिइ हे उल्लेख यानाः निर्देशन यानागु यातायात व्यवस्था विभागं न्ह्यथंगु दु । विभागया प्रवक्ता गोकर्णप्रसाद उपाध्यायं कम्पनीइ दर्ता जुइत वनेगु इलय् कम्पनी ऐनकथं सछिम्ह स्वयां अप्वः सदस्य दुु अवस्थाय् प्रा.लि.इ दर्ता जुइ मफइगु व्यवस्था दुगुलिं आपालं सवारी अझं दर्ता प्रक्रियाय् मवःनिगु धयादिल ।

वय्कःयाकथं आतकया दुने १०द्वः सवारी साधन जक सहकारी वा प्रा.लिया श्रपय् दर्ता जुयाः यातायात व्यवस्था ज्याकुथिइ पञ्जीकरण जूगु दु । प्रा.लि.इ वनेत ऐन हे बाधक जूगु धासें व्यवसायीतय् गुनासो लिखित रुपं वःगुलिं ऐन संशोधनया प्रक्रियाय् दुगु वय्कलं धयादिल ।

वय्कःया कथं सार्वजनिक सवारीयात दर्ता प्रक्रियाय् वनेत थ्व हे फागुनतकया म्याद बियातःगु दु । ट्याक्सी मिटरय् वंगु वा मवंगु वा आरक्षण सिटया कार्यान्वयन बारे यात्रुं फोन वा सन्देशपाखें थःपिंत ९८५१२७३२२२ न य् जानकारी बिल धाःसा थःपिंसं कारवाही यायेगु वय्कलं धयादिल ।