ग्यास स्टकय् मतयेत इनाप

येँ – माग कथं एलपी ग्यास आयात जुयाच्वंगुलिं अनावश्यक रुपं भन्डारण मयायेत व हल्लाया लिउलिउ मवनेत नेपाल आयल निगमं इनाप याःगु दु । ग्यासया कमिशन अप्वयेकेमाःगु माग यानाः नेपाल ग्यास बिक्रेता संघं विरोध ज्याझ्वः सार्वजनिक याःगु व संघ व निगम दथुया वार्ता नं निष्कर्षय् थ्यंके मफयाच्वंगु इलय् निगमं थ्व इनाप याःगु खः ।

मेखे उपभोक्तातय्सं व्यवसायीतय्सं आन्दोलनया ज्याझ्वः पितबीवं आः हाकनं ग्यास कायेगु मदइगु खः ला धकाः धमाधम छेँय् छेँय् ग्यास स्टक तयेगु सुरु यानाहःगु दु । निगमं भारतं निरन्तर ग्यास आयात जुयाच्वंगु व बजारय् ग्यासया अभाव मदुगु खँ धाःगु दु ।

उपभोक्तायात माःकथं सहज रुपं ग्यासया आपूर्तिइ गुगु नं कथंया समस्या मदुगु धासें निगमं अनावश्यक रुपं ग्यासया सिलिन्डर भण्डारण मयायेत नं इनाप याःगु खः । ग्यास व्यवसायी संघं धाःसा थःपिंत बियाच्वंगु कमिशन मगाः धासें वइगु फागुन ३० गते निसें ग्यास मकायेगु धकाः धयाच्वंगु दु । थ्व आन्दोलनयात ग्यास बिक्रेता संघं नं समर्थन याःगु दु ।