सतकपेटीया बजाः चिइकेगु अभियानयात समर्थन

येँ(नेपालभाषा टाइम्स)÷नेवाः जागरण मञ्चं येँ महानगर दुनेया सतक पेटीइ तयातःगु बजाः चिइकेगु अभियानयात समर्थन याःगु दु ।

येँ महानगरपालिकां सतकपेटी न्यंकं लाक्वपाक्व थासय् तयात वयाच्वंगु पसः (फुटपाथ) पसः व बँपसः चिइकेगु अभियान छुं न्हि न्ह्यःनिसें न्ह्याका वयाच्वंगुयात मञ्चं समर्थन याःगु खः । मञ्चं छगू विज्ञप्ती जारी यासें महानगरं थुगु अभियानयात निरन्तर रुपं न्ह्याकेत नं माग याःगु दु । सतकपेटी हे त्वपुक व लँजुवाःलिसें सवारी साधनयात तकं वये वने यायेत तयातःगु थुकथंया फुटपाथ पसलं महानगरया सौन्दर्यताय्तकं दीर्घकालीन समस्या लाकाच्वंगु धासें मञ्चं अभियान निरन्तर रुपं न्ह्याकेत माग याःगु दु ।

विगतया इलय् प्रत्येक स्थानीय तहया निर्वाचन लिपा महानगरया नेतृत्वं पहलकदमी कयाः बँपसः व फुटपाथ पसः चिइकेत जोडतोडं पलाः न्ह्याकूसां समस्या धाःसा हाकनं गथे खः अथे हे कायम जुयाच्वंगु अनुभव महानगरवासी यानाच्वंगु विज्ञप्तीइ धयातःगु दु ।

तत्कालीन महानगर प्रमुख पीएल सिंहं सतकपेटीइ तयातःगु पसः चिइकेत महानगर प्रहरीया व्यवस्था याःसां उकिं स्थायी रुपं समाधान याये मफुगु नापं वय्कलं हिउमतय् वैकल्पिक व्यवस्था यायेगु धाःसां नं उकी नं सफल जुइ मफुगु विज्ञप्तीइ न्ह्यथनातःगु दु ।

नगरया सौन्दर्य म्हो यायेगु, लँजुवा व सवारी साधनयात नं असुविधा जुयाच्वंगु गुकथंया पसलं समस्या दीर्घकालीन रुपय् खने दयाच्वंगु व उकियात स्थायी समाधान यायेमाःगु थौंया आवश्यकता जूगु खँ विज्ञप्तीइ धयातःगु दु ।

मञ्चं अभियानयात समर्थन यासें आवश्यक जूसा सतकय् नं कुहां वयेत सकसितं अपील नं याःगु दु ।