ने. सं. ११४४ कौलाथ्व पारू - नःलास्वनेगु

कमलपुखू निर्माणया जिम्मा स्थानीयवासीयात

ख्वप – येँ महानगरपालिका थनया कमलपोखरीइ च्वंगु पुखू निर्माणया जिम्मा स्थानीयवासीयात बीत तयार जूगु दु । कमलपुखू निर्माण नापं उकिया व्यवस्थापन व संरक्षणया जिम्मा स्थानीयवासीं काइगु जुल धाःसा उकिया जिम्मेवारी बीत थःपिं तयार दुगु मनपां न्ह्यथंगु दु ।
येँ मनपाया प्रमुख विद्यासुन्दर शाक्यं पुखू निर्माणया जिम्मा स्थानीय कायेगु खःसा बीत मनपा तयार दुगु खँ धयादीगु खः ।

मनपाया सहरी योजना आयोगं छुं दिं न्ह्यः थन पुखू निर्माणया विषययात कयाः स्थानीयवासीलिसे जूगु सहलह ज्याझ्वलय् मनपा प्रमुख शाक्यं उगु खँ धयादीगु खः । पुखूया निर्माण उकिया ऐतिहासिकता ल्यनीकथं यायेमाःगु मनपाया न्हापांगु प्राथमिकता दु । उकिं व हे कथं पुखूया निर्माण यायेत स्थानीयवासी तयार जूसा थःपिं जिम्मेवारी बीत नं तयार दुगु वय्कलं धयादिल ।

आयोगया सदस्य सचिव सरोज बस्नेतं पुखूयात निर्माण यायेगु खँय् जक ध्यान बीगु मखसे वास्तु शास्त्रया लिधंसाय्, ज्ञान प्राप्त यायेगु व सीपयुक्त कलात्मक सम्पदाया रुपय् नं विकास यायेगु योजना दुगु जानकारी बियादिल ।

सहलह ज्याझ्वलय् संघीय संसद सदस्य गगन थापां आकिवं छठ पर्व तकया दुने पुखू निर्माण याये सिधयेकेमाःगु खँय् बः बियादिसें सकसिगुं पहुँच दइकथंया पुखू निर्माण यायेमाःगु व उकिया निंतिं महानगरपालिकां नं थःगु भूमिका म्हितेमाःगु सुझाव बियादिल ।

ज्याझ्वलय् सहभागि स्थानीयं पुखू सुचुकुचु यायेगु, सुरक्षाया खँय् न्हापा जूगु अभ्यासया लुमंकेमाःगु, पुखूया जग्गा अतिक्रमण जुइगुपाखें बचे यायेमाःगु, पुखूया स्वच्छता कायम यायेमाःगु, अतिक्रमण जूगु जग्गा लित बीमाःगु, स्रोतया दुरुपयोग पनेमाःगु नापं बालमैत्री व ज्येष्ठ नागरिकमैत्री जुइमाःगु लगायतया सुझाव बिउगु खः ।