थौं कागेश्वरी नपा घेराउ

पेप्सीकोला–ब्रम्हखेल सतक विस्तार विरोध

येँ –  येँया पेप्सीकोला निसें ब्रम्ह खेल तक सडक विस्तार यायेत्यंगुयात कयाः स्थानीय वासिन्दां विरोध याःगु दु । कागेश्वरी नपाया मेयर व ९ वडाया वडाध्यक्ष सहित वयाः म्हीग सडक विस्तार यायेगु बारे माइकिङं यायेवं स्थानीय वासिन्दां विरोध याःगु खः । विरोध ज्याझ्वलय् म्हिगः उपत्यकाव्यापी सतक विस्तार पीडित संघर्ष समितिं नं ब्वति काःगु खः ।

विरोध ज्याझ्वलय् न्ववासें संघर्ष समितिया संयोजक सुमन साय्मि सरकारं विकासया नामय् विनास यायेत्यंगु द्वपं बियादिल । भाजु साय्मिं बियादीगु जानकारी कथं न्हापा उगु सतक खण्डय् पेटी दयेकातःगु खः । उगु पेटी नं थुनाः सतक विस्तार यायेधुंकूगु दु । थ्व धुंकाः नं हाकनं धः व मेगु पेटी दयेकेमाल धासें अन च्वंगु छेँ थुनेगु कथं स्थानीय निकाय तयारी यानाच्वंगुलिं स्थानीय जनतां विरोध प्वंकूगु खः ।

विरोध ज्याझ्वः जुयाच्वंगु इलय् पत्रकारतय्सं न्यंगु न्ह्यसःया लिसः बिइगु झ्वलय् कागेश्वर नपा–९ या वडाध्यक्ष कुन्दन खड्कां धाःसा सतक विस्तार मापदण्ड कथं जुयाच्वंगु धकाः बचाउ याःगु खः । वडाध्यक्ष खड्कां नियम अःखः दयेकूगु संरचना राज्यं चीके फइ धकाः धाःगु खःसा स्थानीय जनतां अदालतय् विचाराधीन मुद्दाय् राज्यं हस्तक्षेप यायेगु धइगु सर्वोच्च अदालतया बर्खिलाप जुइगु खँ धाःगु खः ।

उगु लागाय् सतक विस्तार यायेबलय् १०८ खा छेँ थुनेमालिगु धासें थुकिं स्थानीय जनता विस्थापित जुइमालिगु स्थानीयबासीं धाःगु दु । स्थानीय अनिश बैद्यं सतकं न्यागू न्यागू फिट जग्गा त्वःतेगु खःसा अन दुगु छखा नं छेँ ल्यनिमखु धासें थःपिंसं गुगुं हालतय् उगु सडक विस्तार याके मबिउगु खँ धयादिल ।

वय्कलंं सतक विस्तारयात कयाः सर्वोच्च अदालतय् मुद्दा विचाराधीन जुयाच्वंगु इलय् सर्वोच्चया आदेशयात तकं उल्लंघन यायेगु ज्या सरकारं याःगु धासें उकियात तुरुन्त दिकेमाःगु माग नं यानादीगु दु । थ्वहे झ्वलय् सतक विस्तारया विरुद्ध कन्हय् स्थानीय जनतां कागेश्वरी नपा घेराउ यायेगु तयारी यानाच्वंगु दु ।

घेराउ ज्याझ्वलय्उपत्यका सतक विस्तार पीडित संघर्ष समितिं ऐक्यबद्धता प्वंकूसें स्वनिगःया पीडित जनतायात उगु घेराउ ज्याझ्वलय् ब्वति कायेत इनाप याःगु दु । अथेहे वइगु १८ गते सक्वःया थलीइ नं पीडित जनतां घेराउ ज्याझ्वः याइगु जानकारी संयोजक साय्मि कनादीगु दु ।

 

 

सम्बन्धित बुखँ

LEAVE YOUR COMMENTS