आः शनिवाःपतिं हनुमन्ते सफाई

ख्वप – ख्वपय् आः शनिवाः पतिकं हनुमन्ते सफाई अभियान न्ह्याकीगु जूगु दु । म्हीग थनया बाराही ताँनिसें राममन्दिर तकया लागाय् जूगु हनुमन्ते सफाई अभियान कलाकार धुर्मुसं उलेज्या यानादिल । उगु ज्याझ्वलय् निद्वः मनूतय् सहभागिता दुगु खः । नेपाल प्रहरी, नेपाली सेना व सशस्त्र प्रहरीया सहभागिताय् स्थानीय जनता जानाः उगु सफाई अभियान न्ह्याकूगु खः । उलेज्याया समापन ज्याझ्वलय् अन्तर्राष्ट्रिय धावक कान्छीमैंया कोजूं सुभाय् देछानादिल ।

सांसद महेश बस्नेत, सूर्यविनायक नगरपालिकाया मेयर बासुदेव थापा, समाजसेवी रोमन शिलाकार व जिल्ला समन्वय समितिया संयोजक नवराज गेलालपिंसं नुगःखँ प्वंकादीगु उगु ज्याझ्वलय् सफाई अभियान न्ह्याकेगु लागिं किरण राना, भगवती खड्का, डा. बच्चुराम व हिन्दू जागरण मञ्चं न्याद्वः न्याद्वः तका दां आर्थिक ग्वाहालि नं याःगु खः । उकुन्हु जक नीगू टन फोहोर मुंकूगु खः । हनुमन्ते नदी सफाई अभियान ज्याझ्वःया मेगु वालय् ख्वँह्रेनं सफाई अभियान न्ह्याकीगु खँ धाःगु दु ।
बागमति खुसि सफा यायेगु लागिं नं थथे हे शनिवाःपतिं अभियान न्ह्याकेगु ज्या जूगु खः ।