शेयर कारोवार याकनं पूवंक अनलाइन प्रणालीइ वइगु

येँ – निगूगु बजारय् शेयर न्यायेमी यायेबलय् पूवंक अनलाइन पाखें भुक्तानी यायेफइगु जूगु दु । थ्वयां न्ह्यः शेयर न्यायेबलय् जक अनलाइन प्रणालीपाखें भुक्तानी यायेफइगु व्यवस्था दुगु खःसा आः छुं न्हि लिपा हे मियागु शेयर भुक्तानी नं अनलाइनपाखें हे यायेफइगु जूगु दु । नेपाल क्लियरिङ्ग हाउसं अनलाइन प्रणाली पाखें भुक्तानी यायेगु निंतिं प्रणाली दयेकूगु खः ।

क्लियरिङ्ग हाउसं न्हापांगु चरणय् न्यानागु शेयरया ध्यबा अनलाइनपाखें भुक्तानी यायेगु व्यवस्था याःगु खःसा आः याकनं हे लगानीकर्ता मिउगु शेयरया ध्यबा अनलाइन पाखें हे थःगु खाताय् वइगु खँ धाःगु दु ।आः लगानीकर्तां छन्हुं छगू बैंकपाखें अनलाइन मार्फत अप्वलय् झिगू लाख तका तक भुक्तानी यायेदइ ।

आः याकनं हे लगानीकर्ता मिउगु शेयरया ध्यबा अनलाइन पाखें हे थःगु खाताय् वइगु ।

क्लियरिङ्ग हाउसया सिइओ निलेशमान सिंह प्रधानया कथं थुकियात आवश्यकता कथं अप्वयेका यंकेफइगु खँ धयादीगु दु ।नेपाल स्टक एक्सचेञ्जया कथं निगूगु बजारय् कारोवार यायेगु निंतिं निगू लाख ९४ हजार लगानीकर्तातय्सं थःगु केवाइसी अध्यावधी याःगु दु । तर थुपिं मध्ये ११ हजार २४६५ म्हेसिनं जक निगूगु बजारय् कारोवार यानाच्वंगु दु ।

चालु आर्थिक दँय् अनलाइन पाखें १० अर्ब, ६० करोड तकाया कारोवार जूगु दु । निगूगु बजारय् पूवंक शेयर कारोवार धाःसा ७७ अर्ब ७४ करोडया जूगु दु । अथेहे चालु आर्थिक दँय् आःतक झिगू लाख ६ हजार शेयर कारोवार जूगुलिं छगू लाख ४५ हजार धाःसा अनलाइनपाखें जूगु दु ।