महानगरपालिकाया करय् छुट

येँ (नेपालभाषा टाइम्स)- येँ महानगरपालिकां क्वःछिनातःगु ई दुने हे व्यवसायीक कर पुलेत इनाप याःगु दु । येँ महानगरपालिकाया राजश्व विभागं छगू सुचं जारी यासें इलय् हे कर पुलाः महानगरपालिकां बिया वयाच्वंगु छुट सुविधा कायेत धाःगु दु ।

महानगरपालिकां आः पुले ल्यंदनिगु सम्पत्ति कर, बहाल कर व व्यवसाय करय् छुट सुविधा बिउगु दु । सम्पत्ति, व्यवसाय व बहाल कर नियमित पुलाच्वंपिं वइगु पुस मसान्त दुने चालु आर्थिक दँया कर नं पुल धाःसा १० प्रतिशत छुट बीगु जुयाच्वंगु दु । अथेहे होटल, रिसोर्ट वा हलया नामय् छेँ, जग्गा दुपिं वा बालं कयाः होटल, रिसोर्ट वा हल चले यानाच्वंपिंसं बक्यौतासहित सम्पत्ति कर पुस मसान्त तकया दुने पुल धाःसा थप ३० प्रतिशत छुट दइगु धाःगु दु ।

अथेहे व्यावसायिक रुपं गाडी पार्किङया निंतिं छेँ दयेकूगु खःसा अज्याःगु भवन दयेके क्वचाःगु मिति निसें पार्किङया निंतिं छ्यलीगु क्षेत्रया सम्पत्ति कर १० वर्ष तकया निंतिं छुट बीगु जुइ ।

अथेहे ‘छगू वडा छगू नमूना उद्यम’ कार्यक्रम अन्तर्गत संचालन जुयाच्वंगु उद्योग वा व्यवसाय जूसा दर्ता जूगु स्वदँ तकया निंतिं पुलेमाःगु व्यवसाय कर व दर्ता शुल्कय् ९५ प्रतिशत छुटया व्यवस्था यानातःगु दु ।

चालु आर्थिक दँ २०८०-८१ इ करया दायरा मवःपिं मिसा, जनजाति, दलित, अपांग व ३५ दँ स्वयां म्हो उमेरया ल्याय्म्हपिनिगु नामय् दर्ता जुयाः संचालन जुयाच्वंगु न्यागू लाख तकया पुँजीगत लगानी दुगु उद्योग, व्यवसाय, कम्पनी, संस्थां नं पुस मसान्त तक दुने कर पुल धाःसा ४० प्रतिशत छुट बीगु, अथेहे नियमित कर पुलाच्वंपिं करदातातय्त कर रकमय् २५ प्रतिशत छुट बीगु जुयाच्वंगु दु । थुकी नं येँ महानगरपालिकाय् स्थायी बसोबास यानाच्वंपिंत जूगु ५० प्रतिशत छुट जुइगु खँ धाःगु दु ।