दकलय् यःगु मां भाय्

जि दकलय् अप्वः थ्यंगु देय् खः, बंगलादेश । प्यक्वः जि अन वने धुन । बंगलादेश थ्यन कि छगू थासय् जि न्ह्याब्लें वना, अले व खः– ढाका मेडिकल कलेज क्याम्पस । न्हापांगु पालय् ढाकाय् वनाबलय् अनया पत्रकार पासापिंसं यंकूगु खः, अन वने हे माः धकाः । लिपा जि थः हे वनेगु याना । उगु क्याम्पसय् स्मारक दयेका तःगु दु, गुकीयात सहीद स्मारक धायेगु याः ।

अले थ्व खः, थःगु मां भाय्या नितिं बलिदान याःपिं सहीदतय्त लुमंकाः दयेकाः तःगु स्मारक । थन थ्यन कि जिं थःत अलग हे अनुभव याना, अले लुमंका– ओहो, जिगु मां भाय् नेपाल भाषा । अले थ्व भाय् तसकं यः, छाय् धाःसा थ्व भाय् जितः जिमिं मामं स्यनातःगु खः । बंगलादेशय् वन धाःसा छताः खँ यच्चुक अनुभव यायेफु, थन च्वंपिं मनूतय्के थःगु मां भाय्प्रति तसकं मतिना दु । अथें नापं बंगला भाय् तसकं बांलाः, न्यनेबलय् हे न्ह्यइपुसे च्वं । .

प्रत्येक बंगालीयाके छताः भावना दु, बंगाली जिगु मां भाय् खः, थ्व भाय्यात मतिना यायेगु जिगु कर्तब्य खः । उमिसं धायेगु नं याः, थ्व भाय मंत धाःसा जिमिगु अस्तित्व गन दइ ? अझ धाये, बंगाली भाय् मंत धाःसा बंगलादेश दुगुया अर्थ नं छु दु ? पूरा विश्वय् दकलय् अप्वः ल्हाइगु भाय्मध्ये छगू खः– बंगाली ।

बंगलादेशय् जक मखु, भारतया पश्चिम बंगाल व वया जःखःया मेमेगु राज्य नं थ्व भाय् ल्हायेगु याः । उपिं सकलें थःगु मां भाय् धालकि तसकं गर्व याइपिं खः । थ्व हे छता कारणं यानाः पूरा विश्वय् बंगालीतय्त लुमंकेगु याः । म्हिगः अन्तर्राष्ट्रिय मातृभाषा दिवस । विश्वन्यंक थ्व न्हि थीथी विशेष ज्याझ्वः याना न्यायेकल ।

फेब्रुअरी २१ यात संयुक्त राष्ट्र संघं हे मातृभाषा दिवस कथं हना वयाच्वंगु दु । थ्व न्हि न्यायेके माःगुया उद्देश्य खः, विश्वय् यक्वंया यक्वः भाय् दु । भाय् नापं संस्कृति नं स्वाना वइ । उकिं झीसं बहुभाषितायात च्वछायेमाः, थुकियात न्ह्यःने यंकेमाः । मनू धात्थें मनू जूगु भासं ला खः, अले मां भाय्या महŒव सुयात जक मदइ ? मदुसा व गथे जुया मनू जुइ ?

सन् १९५२ य् बंगलादेशय् थःगु मां भाय्या नितिं आन्दोलन सुरु जूगु खः । उब्ले थःगु भाय् न्ववाये दयेमाः धकाः मागयासें आन्दोलन याःपिं विद्यार्थीतय्त चरम दमन याःगु खः, गुकिया झ्वलय् यक्व सहीद जुल । उबलय् तक बंगलादेशया अलग अस्तित्व मदुनि । पाकिस्तानया व छगू भाग जक खः, अले उकियात पूर्वी पाकिस्तान धाइगु ।

लिपा थ्व हे भाषाया आन्दोलनं बंगलादेश अलग जुल । छगू स्वतन्त्र देय स्थापित जुल, सन् १९७१ य् । भाषाया नितिं अलग स्वतन्त्र देय् जूगु बंगलादेश हे छगूयां छगू जक देय् खः । थ्व ल्याखं अन्तर्राष्ट्रिय मातृभाषा दिवस न्यायेकीबलय् बंगलादेशया न्ह्यथना ला वइगु हे जुल । अन्तर्राष्ट्रिय मातृभाषा दिवस न्यायेके माः धकाः पहल यायेगु ज्या नं बंगलादेशं हे याःगु खः । बंगलादेशया स्थापनानिसें उमिगु भाषा आन्दोलनया इतिहास तसकं ताःहाकः ।

धाथें बंगलादेशं स्वतन्त्रताया नितिं छु छु बलिदान यात, व छक्वः ब्वनेबहगु इतिहास खः । आः नं छता खँ छु निश्चित दु धाःसा अन्तर्राष्ट्रिय मातृभाषा दिवसया महŒव न्हापा गुलि दु, आः वया व झन् अप्वःया च्वंगु दु । झीसं नं थःगु मांभाय्या निंतिं यानागु आन्दोलनया इतिहास दु । थुकी झीके नं तसकं गर्व दु । अले झी नेवाःत नं थःगु मां भाय् नेपालभाषा धायेखने मात्रं लय्ताइपिं खः ।

थनथाय् हे म्हाइपुगु छु दु धाःसा झीथाय् नं थःगु मां भाय् त्वःता वनाच्वंपिं अप्वःया वयाच्वंगु दु । उकिं ग्याचिकु दु, गनं झीगु भाय् नं तना वनीगु जकं मखुला ? -अन्तर्राष्ट्रिय मातृभाषा दिवसया न्हि हाकनं छक्वः थुकिया खबरदारी यायेगु ई खः । दकलय् न्हापा विश्वय् थीथी भाषाया तथ्यांकपाखे छक्वः मिखा ब्वयेकेगु पाय्छि जुइ ।

विश्वय् न्हय्द्वःसिबें अप्वः भाय् ल्हायेगु याः । न्ह्यपुसेच्वंगु तथ्य छु धाःसा थ्व ल्याः न्ह्याब्लें च्वय् क्वय् जुयाच्वनी, छाय्धाःसा आःतक नं न्हूगु भाय् लुइकेगु ज्या जुयाच्वंगु दु, अले न्हूगु भाय्या जन्म जुइगु ज्या नं दिउगु मदुनि । थ्व मनू दतले न्ह्यानां तुं च्वनीगु खं खः । अथेहे भाय् लोप जुया वनाच्वंगु नं उतिकं हे दनि ।

तर अप्वः धयाथें भाय् धाःसा न्ह्याब्लें खतराया धलखय् लानाच्वनी । अथे धयागु न्हय्द्वः भाय्मध्ये ३३ प्रतिशत खतराया धलखय् दु । गबलें नं थ्व भाय् तना वनेफु । यक्व भाषाय् थ्व भाय् ल्हाइपिनिया ल्याः द्वःछिति जक दनि । थुपिं मनूतय्त छुं जुल धाःसा उमिगु भाय् नं न्ह्याब्लेंया निंतिं तना वनीगु हे जुल ।

आः पपुवा न्युगिनी हे धाये, थ्व तसकं चिधंगु देय् मध्ये छगू खः । अनया जनसंख्या यक्व मदु, तर भाषाय् थ्व देय् तकसं तःमि, अन ल्हाइगु भाय् हे च्यासः सिबें अप्वः दु । विश्वय् थुलिमछि भाय् दुसां तबि बच्छिसिबें अप्वसिनं खास खास जक भाय् ल्हाइ । अथे धयागु विश्वया कूल जनसंख्याया बछि मनूतय्सं चिनियाँ, स्पेनीस, इंग्लिस र अरेबिक भाय् ल्हाइ ।

दकलय् अप्वः ल्हाइगु भाय् ला, चिनियाँ हे जुल । छगू भायय् ल्याखं थुपिं प्रमुख भाषाया गुलि महŒव दु, द्वःछि अथवा सछि मनूतय्सं ल्हाइगु भाय्या नं उतिकं महŒव दु । भाय् धयागु भाय् जक मखु, व नाप सभ्यता, संस्कृति, रहनसहन, नसात्वँसा, थाय्बाय् सकतां स्वानाच्वनी ।
छगू भाय् तन धयागुया अर्थ थुपिं सकतां तनीगु खः ।

अले मनूतय्सं थःगु मां भासं हे दकलय् न्हापां न्ववायेमाः, छाय् ले ? अथे ला थुकिया कारण थ्यमथ्यं सकसिनं सिउ । थन खालि लिसा कया जक धाये त्यनागु । सु मचां थःगु मां भाय् सयेकी वया बौद्धिक विकासया सम्भावना अप्वः दयाच्वनी । वं थःगु भासंति मेगु भासं थःगु नुगःया खँ धायेफइमखु । अले सुनां थःगु मांभासं खँ ल्हाइ, वयात मेगु भाय् सयेका कायेत अझ अःपुइ ।

थःगु भासं खँ ल्हाइगु जुलकि स्वाभाविक ल्याखं व समुदायया मनूत नाप स्वापू ब्याकेत अःपुइ । दकलय् तःधंगु ख“ ला छु धाःसा थःगु भाय् सःम्ह मनू छुं नं ख्यलय् व्यावसायिक ल्याखं सफल जुइ । थन थथे कारणया धलः दयेका वन धाःसा ताःहाकः जुइफु । अले थःगु भाय् मसःगुया बेफाइदाया धलः दयेकल धाःसा उकिया धलः नं ताःहाकः हे जुइ ।

थथे सिइकं सिइकं थःगु भाय् त्वःतां छु हे दइ ? थःगु भाय् थः मस्तय्त मस्यनां छु हे तःधंगु जुइ धकाः ? अःखबतं बेफाइदा जक जुइ ।
हाकनं छक्वः व हे ढाकाया व हे मेडिकल कलेज क्याम्पसय् लिहां वने । दकलय् न्हापा अन थ्यंबलय् अन यंकूम्ह बंगलादेशी पत्रकार पासाया ख्वालय् खनेदुगु गर्व धाथें स्वयेबह ।

उमित जिपिं बंगाली, जिमिगु भाय् बंगाली धायेबलय्ति गर्व यायेगु मेता छुं हे मदु थें जुइगु जुयाच्वन । वया सकतां खँ न्यनेबलय् जितः नं ताल, जिगु नं थःगु भाय् दु, तसकं यःगु थःगु हे मांभाय्– नेपा भाषा । व बंगालीयात थें दः नं थःगु मांभाषाय् तसकं गर्व दु ।

 

सम्बन्धित बुखँ

LEAVE YOUR COMMENTS