न्हूगु सरकार गठनय् हानं मेगु विवाद
येँ -न्हूगु सरकार गठनय् पिहां वयाच्वंगु थीथी कथंया संवैधानिक व कानुनी विवादया झ्वलय् आः हानं छगू मेगु विवाद पिहां वःगु दु – न्हूगु सरकार गठन यायेगु लागिं प्रतिनिधिसभाया सकलें सांसदतय्सं शपथ ग्रहण यायेमाः लाकि म्वाः ?
प्रतिनिधिसभाया निर्वाचित व समानुपातिक सांसदतय्सं शपथ ग्रहण यायेधुंकाः जक न्हूगु सरकार गठन यायेगु खः लाकि सरकार गठन यायेधुंकाः जक शपथ ग्रहण याःसां गाः धइगु न्ह्यसः पिहां वःगु खः ।
सत्तारुढ दल नेपाली कांग्रेसं न्हूगु सरकार गठन यायेगु लागिं भोट बीपिं ला सांसदत खः, उकिं सांसदतय्सं शपथ ग्रहण मयायेकं राष्ट्रपतिं न्हूगु सरकार गठनया लागिं आह्वान याये फइ मखु धयाच्वंगु दु ।
प्रतिपक्षी लिसें वंगु चुनावय् अप्वः मत हःगु दल एमालें धाःसा सांसदतय्सं शपथ ग्रहण याय न्ह्यः हे राष्ट्रपतिं न्हूगु सरकार गठनया लागिं आह्वान याये फइ धइगु तर्क तयाच्वंगु दु ।
एमालेया नेता लिसें पुलांम्ह सभामुख सुवास नेम्बाङं न्हापा नं शपथ ग्रहण याये न्ह्यः हे सरकार गठनया आह्वान याःगु जुयाः आः नं राष्ट्रपतिं आह्वान याये फइ धइगु तर्क तयादीगु दु । तर सरकारया कानुनी सल्लाहकार समेत जुयाच्वंम्ह महान्यायाधिवक्तां धाःसा प्रधानमन्त्रीं राजीनामा मबीकं राष्ट्रपतिं न्हूगु सरकार गठनया आह्वान याये फइ मखु, अले न्हू वःपिं सांसदतय्सं शपथ ग्रहण मयायेकं प्रधानमन्त्रीं राजीनामा बियादी मखु धकाः थःगु धापू न्ह्यःने तःगु दु ।
शपथ ग्रहण याकाः जक न्हूगु सरकार गठनया आह्वान जुल धाःसा न्हूम्ह प्रधानमन्त्री वयेत अझ नं खुन्हु न्हय्न्हु ति ढिला जुइफुगु खँ सूत्रं धाःगु दु ।
LEAVE YOUR COMMENTS