छु निर्णय यायेमाः या, जि फेस यायेत तयार दु : प्रम ओली

येँ (नेपालभाषा टाइम्स) – सत्तारुढ नेपाल कम्युनिष्ट पार्टी (नेकपा) या अध्यक्ष पुष्पकमल दाहाल, मेम्ह अध्यक्ष लिसे प्रधानमन्त्री केपी शर्मा ओली व वरिष्ठ नेता माधवकुमार नेपाल दथुइ म्हिगः जूगु वार्ता नं बिना निष्कर्ष क्वचाःगु दु ।

म्हिगः वार्ताय् ओली पक्षया महासचिव विष्णु पौडेल नं च्वयानादीगु खः । प्यम्ह नेतातय् दथुइ जूगु खँल्हाबल्हाय् अध्यक्ष दाहाल व नेता नेपालं ओलीयात अध्यक्ष व प्रम पदं राजिनामा बीत इनाप याःगु खः । तर प्रम ओलीं म्हिगः नं थम्हं छुं नं पदं राजीनामा बीमखु धकाः तप्यंक हे अस्वीकार यानादीगु खः ।

बालुवाटर स्रोतं धाःकथं म्हिगः नं प्रम ओलीं जिं राजीनामा बीमखु, छिकपिंसं छु यायेफु या धकाः धयादीगु खः । वय्कलं स्थायी समितिं छु निर्णय यायेमाः या, जि फेस यायेत तयार दु धयादीगु खँ स्रोतं धाःगु दु। स्थायी समितिया बैठक थनिंनिसें हाकनं च्वनेगु क्वःछिनातःगु खः । बैठक न्ह्यः हे सहमति मालेमाः धासें अध्यक्ष दाहाल नेता नेपाललिसें बालुवाटर वंगु खः । थ्व स्वयां न्ह्यः जूगु आपालं वार्ता निम्ह अध्यक्ष दथुइ जक जुयाच्वंगु खःसा निम्हेसिया दथुया वार्तां उपलब्धी मजुइवं म्हिगः नेता नेपाल व महासचिव पौडेल सहित च्वनाः खँल्हाबल्हा याःगु खः ।

तर थ्व वार्ता नं निगुलिं पक्षया अडानं यानाः बिना निष्कर्ष क्वचाःगु खः । दाहाल व नेपाल बालुवाटारय् वने न्ह्यः दाहालया छेँ खुमलटारय् नेकपा सचिवालय समितिया खुम्ह नेता दथुइ नं सहलह जूगु खः । उगु सहलहय् झलना खनाल, बामदेव गौतम, नारायणकाजी श्रेष्ठलिसें गृहमन्त्री रामबहादुर थापा दुथ्याःगु नं खः । सहलहय् प्रधानमन्त्रीया राजीनामा फ्वनेगु अडान कायम यानातयेगु सहमति जूगु खः ।

स्थायी समितिया बहुमतं निर्णय यायेबलय् पार्टी तज्यायेफु धकाः स्थायी समितिया बैठक स्थगित यानाः प्रम लिसे सहलह याना वयाच्वंगु खः । तर सहमति धाःसा जुइ फयाच्वंगु मदु ।