
येँ(नेपालभाषा टाइम्स)- येँ महानगरपालिका वडा नं. १० या बबरमहलय् हाकनं मेगु छगू फल्चा शैलीया बस स्टप निर्माण याःगु दु । बबरमहलं बानेश्वरपाखे विजुली बजाःया ताँ पुलेवं लिक्कं लाःगु सतकखण्डय् फल्चा शैलीया बस स्टपया उलेज्या याःगु खः ।
येँ महानगरपालिकाया उपप्रमुख सुनिता डंगोलं उगु फल्चा शैलीया बस स्टपया उलेज्या यानादीगु खः । फल्चा बस स्टपया उलेज्या लिपा उपप्रमुख डंगोलं थुपिं संरचनात येँ देय्या म्हसीकालिसे स्वानाच्वंगु नेवाःया परम्परागत व मौलिक निर्माण शैलीया जूगु व थज्याःगु संरचना स्मारक जुइगु विश्वास प्वंकादिल ।
उप्रमुख डंगोलं येँ देय्या पहिचान मुख्य सतकपाखें प्रवद्र्धन जुइ धासें सहरी सेवा वितरण व सुविधा व्यवस्थापन यायेगु ज्यालिसें मौलिकतायात नं स्वाना यंकेगु जुइ धयादिल । वडाअध्यक्ष रामकुमार केसीं थुकथं निर्माण यानागु संरचनाया सुरक्षा यायेत फल्चा निर्माण उपभोक्ता समितिलिसें उगु लँपु जुयाः वये वने याइपिं हरेक लँजुवा व स्थानीयवासी जुइ धासें सकसितं समान दायित्व बोध याये फयेकेमाः धयादिल ।
वडा सदस्यलिसें फल्चा निर्माण उपभोक्ता समितिया संयोजक सतिश तण्डुकारं कलात्मक नेवाः शैलीया बस स्टपय् च्वनेत सिँयागु हे मेचया व्यवस्था यानागु जानकारी बियादिल । लिसें वय्कलं याकनं हे न्हू बानेश्वर चोकया जःखः नं निगू थुकथंया हे बस स्टप दयेकेगु योजना दुगु नं जानकारी बियादिल । लुमंकेबहजू थ्व स्वयां न्ह्यः वंगु जेठ १ गते नं थुगु हे सतकखण्डया मेखे फल्चा शैलीया बस स्टप दयेकाः संचालनय् हःगु खः ।
परम्परागत निर्माण सामग्रलिसें स्थानीय मौलिक शील्प व शैलीं निर्माण याःगु फल्चा शैलीया थुपिं निगू बस स्टप निर्माण यायेत ५३ स्वंगू लख तका खर्च जूगु नं वडा सदस्य तण्डुकारं कनादीगु दु ।
LEAVE YOUR COMMENTS