जलविद्युत कम्पनीतय् शेयर भाः आधारमूल्यं क्वय्

येँ – छुं ई न्ह्यव तक लगानीकर्तातय् दकलय् आकर्षक जुयाच्वंगु जलविद्युत कम्पनीतय् शेयर नं शेयर बजाः कुहां वंलिसे बांमलाक कुहां वनाच्वंगु दु । नेपाल स्टकय् सुचिकृत जुयाच्वंगु २१ गू जलविद्युत कम्पनी मध्ये स्वंगू कम्पनीया शेयर जक २०० तका स्वयां थहां वनाच्वंगु दु । गुलिखे कम्पनीया शेयरया भाः ला आधारभूत भाः स्वयां कुहां वनेधुंकूगु दु । शेयर बजाः निरन्तर कुहां वंलिसे उकिया प्रभाव जलविद्युत कम्पनीया शेयरय् नं लाःगु दु । बांलाःगु कम्पनी धकाः नालातःगु कम्पनीतय् शेयर तक आधारभूत मू बराबर थ्यनाच्वंगुलिं थुकिं लगानीकर्तायात नकारात्मक प्रभाव लाकूगु दु ।

छुं ई न्ह्यव तक जलविद्युत कम्पनीतय् शेयर लगानीकर्तातय् मू आकर्षण जुयाच्वंगु खः । ताःई न्ह्यवनिसें कुहां वनाच्वंगु नेशनल हाइड्रोपावर कम्पनीया शेयर भाः ला बजारय् छगू कित्ताया ७७ तका जक जुयाच्वंगु दु । वंगु बुधवाः थ्व कम्पनीया शेयर आधारभूत मू स्वयां २३ तका म्हो जुयाः न्याये–मी जूगु खः । अथेहे दिव्येश्वरी हाइड्रोपावर कम्पनीया शेयर नं आधारभूत मू स्वयाः कुहां वनाच्वंगु दु । थ्व कम्पनीया भाः प्रति कित्ता ९७ तका थ्यनाच्वंगु दु ।

कुहां वनाच्वंगु बजाःया प्रभाव खानीखोला हाइड्रोपावरय् नं लाःगु दु । थ्व कम्पनीया शेयर भाः नं प्रति कित्ता ९७ हे थ्यनेधुंकूगु दु । चिलिमे जलविद्युत आयोजनाया शेयर बाहेक मेमेगु जलविद्युत कम्पनीया अवस्था खराब जुयाच्वंगु नेप्सेया तथ्यांकं क्यनाच्वंगु दु । छुं ई न्ह्यव तक तसकं आकर्षक शेयर जुयाच्वंगु सरकारी स्वामित्वय् दुगु चिलिमेया शेयर नं प्रतिकित्ता ६८८ तका थ्यनेधुंकूगु दु ।

नेपाल स्टकया कथं अरुण काबेली जलविद्युत कम्पनीया शेयर २१२, अरुण भ्याली हाइड्रापावर कम्पनीया १२६, बरुण हाइड्रोपावर कम्पनीया १२१ तका थ्यनेधुंकूगु दु । न्यासः व छतका दामं एफपीओ पिकाःगु बुटवल पावर कम्पनीया शेयर भाः तकं कुहां वयेधुंकूगु दु । थ्व कम्पनीया शेयर प्रतिकित्ता ४६० थ्यनेधुंकूगु दु । शेयर बजाः कुहां वःगुलिं यानाः छ्याङदी हाइड्रोपावरया शेयर १०८, कालिका पावरया ११३, नेपाल हाइड्रो डभलपर्सया १२० तकां शेयर न्यायेमी जुइधुंकूगु दु । अथेहे हिमालयन प ावर पार्टनरया २०५ तका, ङादी गु्रप पावरया १२९ तका, पञ्चकन्या माइया १२३ तका, राधी विद्युत कम्पनीया १८० तका व रेराङ हाइड्रोपावरया शेयर प्रतिकित्ता १११ तका तक थ्यनेधुंकूगु दु ।

अथेहे रिडी हाइड्रोपावरया शेयर १०५ तका, सिनर्जी पावर डेभलपर्सया १०० तका व युनाइटेड मोदीया १४३ तका थ्यनाच्वंगु दु । नेप्सेय् सुचीकृत सानिमा माइ जलविद्युत कम्पनीया धाःसा छुं तथ्यांक खनेमदयाच्वंगु दु ।

धितोपत्र बोर्डय् झिंन्यागू जलविद्युत कम्पनीं साधारण शेयर मिइगु तयारी यानाच्वंगु इलय् निगूगु बजारय् जलविद्युत कम्पनीया शेयर निरन्तर कुहां वनाच्वंगुलिं यानाः आः पिहां वयेत्यंगु शेयरय् नं प्रभाव लाकीगु खनेदयाच्वंगु दु । कात्तिक १६ गते निसें १९ गत तक माथिल्लो तामाकोशी जलविद्युत कम्पनीं छगू अर्ब ५८ करोड तका बराबरया साधारण शेयर पित बिउगु खःसा मध्य भोटकोशी जलविद्युत कम्पनीं नं १ अर्ब ४४ करोड तका बराबरया सीमित साधारण शेयर मीगु सुरु यायेधुंकूगु दु ।