चालक अनुमति पत्र छापे यायेत मास प्रिन्टर

येँ – यातायात व्यवस्था विभागं छक्वलं आपालं प्रति चालक अनुमति पत्र (लाइसेन्स) छापे यायेगु मेशिन हइगु जूगु दु । विभागं चालक अनुमति पत्र छापे यायेगु ज्याय् जुयाच्वंगु ढिलासुस्ती चिइकेत धासें छक्वलं आपालं प्रति लाइसेन्स छापे यायेगु ‘मास प्रिन्टर’ मेशिन हयेत्यंगु खः ।

थुकिया निंतिं विभागं मेशिन खरिद प्रक्रिया नं न्ह्याकेधुंकूगु दु । विभागया कथं छन्हुं हे च्याद्वःया ल्याखय् लाइसेन्स छापे याये फइगु मास प्रिन्टर न्यायेगु निंतिं बोलपत्र आह्वान यायेगु ज्या जुइधुंकूगु दु । थ्व हे आर्थिक दँया दुने मास प्रिन्टर न्यानाः संचालनय् तकं हयेगु विभागया उपनिर्देशक गोकर्णप्रसाद उपाध्यायं कनादिल ।

चालक अनुमति पत्र छापे यायेगु निंतिं हे १० गू लाख कार्ड माग यायेगु ज्या जुइधुंकूगु जानकारी बियादिसें उपाध्यायं धयादिल, ‘कार्ड व मास प्रिन्टर निगुलिं थ्यंकः वयेवं सेवाग्राहीं आः ताःईक लाइसेन्स कायेत पियाच्वने माली मखुत, याकनं व अःपुक हे सवारी चालक अनुमति पत्र (लाइसेन्स) फइ ।’

झण्डै न्यागू करोड तका तूगु मास प्रिन्टर न्यायेगु निंतिं विभागं प्रदेश सरकारयात जिम्मा बिउगु दु । आः तत्काल प्रदेश सरकारं मास प्रिन्टर न्यानाः चालक अनुमति पत्र छापे यायेगु अवस्था मदुगुलिं विभाग थम्हं हे छापे यायेगु वय्कलं धयादिल । ‘प्रदेश सरकार थम्हं हे मास प्रिन्टर न्यानाः चालक अनुमति पत्र छापे यायेत अझं छुं ई वा छुं दँ हे काये फु, उकिं आः तत्कालया निंतिं विभागं हे छापे यायेगु ज्या जुइ’, वय्कलं धयादिल ।

देय्न्यंकंया यातायात व्यवस्था ज्याकूपाखें न्हूगु सवारी चालक अनुमति पत्र व नवीकरण नापं यानाः प्यंगू लाख स्वयां अप्वः चालक अनुमति पत्र छापे याये ल्यं दु ।

 

सम्बन्धित बुखँ

LEAVE YOUR COMMENTS