लोकन्थलीइ ख्वपया हे न्हापांगु दृश्यावलोकन स्तम्भ

थिमि – मध्यपुर थिमिया लोकन्थलीइ दृश्यावलोकन स्तम्भ निर्माण याइगु जूगु दु । मध्यपुर थिमि नगरपालिकां लोकन्थलीं पुलांगु थिमि वनेगु लँपुइ लाःगु नाट्यश्वरीइ स्वनिगःया दृश्य स्वयेगु ल्याखं ख्वपया न्हापांगु दृश्यावलोकन स्तम्भ निर्माण याये त्यंगु खः । उगु स्तम्भपाखें थिमिया मनोहरा, एसओएस, दिव्यश्वरी क्षेत्र जःखःया बस्तीलिसें स्वनिगःन्यंकंया च्वापुगुँ, त्रिभुवन अन्तर्राष्ट्रिय विमानस्थल स्वये फइगु खँ धाःगु दु ।

मध्यपुर थिमि नगरपालिकाया प्रमुख मदनसुन्दर श्रेष्ठं स्वनिगःया थीथी थाय् स्वये फइकथं नगरपालिकां स्वतँजाःगु ख्वपया हे न्हापांगु दृश्यावलोकन स्तम्भ निर्माण यायेत्यनागु जानकारी बियादीगु दु । उगु थासय् दृश्यावलोकन स्तम्भलिसें नाट्यश्वरी पार्क, देगः, अपांग व बालमैत्री क्यब, आर्टिफिसियल रक क्लाइम्बिङ, व्यायाम यायेगु थाय्, चःबिलगायतकया पूर्वाधार निर्माण याइगु जूगु दु ।

अथे हे उगु थासय् निर्माण सम्पन्न जुइधुंकूगु नितँजाःगु सामुदायिक भवनयात रंगरोगन यानाः व्यवस्थापन नं याइगु जूगु दु । वइगु स्वदँया दुने दयेके क्वचायेकेगु लक्ष्य कयातःगु दृश्यावलोकन स्तम्भ न्हय्गू करोड लागतय् दयेकेत्यंगु खःसा उकिया निंतिं नगरपालिकां चालु आर्थिक दँय् न्हय्न्यागू लाख तका दां विनियोजन याःगु दु ।