फोटो पत्रकारिता अवार्डयात ग्लोबल आइएमईया प्रायोजन

येँ – राष्ट्रिय फोटो पत्रकार समूहं ग्वसाः ग्वःगु राष्ट्रिय फोटो पत्रकारिता अवार्ड–२०४७ यात ग्लोबल आइएमई बैंकं मुख्य प्रायोजन याइगु जूगु दु । बैंकं मुख्य प्रायोजन याइगु जुइवं ज्याझ्वःया नां ‘ग्लोबल आइएमई राष्ट्रिय फोटो पत्रकारिता अवार्ड–२०७४ जुइगु जूगु दु । ज्याझ्वःयात मुख्य प्रायोजन यायेगु सम्बन्धय् आः नकतिनि निगू पक्षया दथुइ छगू सम्झौता जूगु खः ।

औपचारिक रुपं समूहया ग्वसालय् जुइगु ज्याझ्वःया संयोजक प्रदीपराज वन्त व प्रायोजक संस्था बैंकपाखें प्रमुख बजाः व्यवस्थापक गणेश अवस्थीं सम्झौता पती ल्हाःचिं तयादीगु खः । अथे हे लाइफटाइम एचिभमेन्ट फोटो पत्रकारिता अवार्ड विधाय् नं बैंकं प्रायोजन याइगु जुइवं उगु अवार्ड नं ग्लोबल आइएमई बैंकया हे नामं लःल्हाइगु जूगु दु ।

लाइफटाइम एचिभमेन्ट फोटो पत्रकारिता अवार्ड छम्ह वरिष्ठ फोटो पत्रकारयात न्यय्द्वः तका दां, ट्रफी व सम्मान पत्रपाखें सम्मानित याइ । लाइफटाइम एचिभमेन्ट अवार्ड बाहेकं थीथी झिंनिगू विधाय् सिरपाः लःल्हाइगु उगु ज्याझ्वः वइगु बैशाख १३ गते नेपाल आर्मि क्लबय् जुइगु छगू विशेष ज्याझ्वःया दथुइ लःल्हाइ ।