पुलां जुइ मखंपिं हिरो हिरोइनत

दच्छिया सछिया ल्याखं थौंकन्हय् खँय्भाय्या फिल्म पिहां वयाच्वंगु दु । थथे पिदंगु फिल्मय् न्हून्हूगु ख्वाः अप्वया वयाच्वंगु दु । विशेष यानाः फिल्मय् म्हितीपिं हिरो हिरोइनतय्गु ल्याः स्वयेगु खःसा न्हूपिनिगु हे ल्याः अप्वया च्वंगु खनेदइ । निवाः न्ह्यः रिलिज जूगु स्वंगू फिल्म रणबीर, सयकडा दस व गोपी मध्ये “रणबीर” फिल्मया हिरोइन सुपुष्पा भट्ट व सुभेच्छा खड्का निम्हं न्हूपिं हे हिरोइन खःसा “सयकडा दस” फिल्मया हिरोइन करुणा श्रेष्ठ नं न्हूम्ह हे हिरोइन खः ।

खय्त ला रणबीरया हिरो सुशील सिटौला नं पुलां जुइ मलाःनिम्ह हिरो खः,अय्सां न्हूम्ह नं मखयेधुंकल । तर सुशील सिटौलां तसकं हे आश याःगु “रणबीर” फिल्मं नं स्वकुमिया मन त्याकेमफुबलय् थ्व फिल्मया हिरो सुशील सिटौलाया नापनापं हिरोइनत सुपुष्पा व सुभेच्छा नं पुलां जुइ खनि थें खनेमंत । मतलब इपिं स्वम्हेसिया हिरोहिरोइन जुयाः ज्या यानाच्वनेगु इच्छा ताःई तक म्वानाच्वने फइगु खनेमंत ।

कलिउड धकाः धयातःगु खँय्भाय्या फिल्म ख्यलय् पुलां जुइमखंपिं हिरो हिरोइनत यक्व हे दु । गुलिसियां यात्रा छगूनिगू फिल्म धुंकाः क्वचालसा गुलिसियां न्यागू–च्यागू फिल्म धुंकाः क्वचाल । निदँ स्वदँ न्ह्यः “के म तिम्रो हैन र” फिल्मं डेब्यु याःम्ह हिरो आर्यन अधिकारीयात कलिउडया न्हूम्ह स्टारया रुपय् बय्बय् याःगु खःसा थ्व हे फिल्मया हिरोइन मरिष्का पोखरेलया बारे नं यक्व हे चर्चा जूगु खः ।

उमिगु डेब्यू फिल्म “के म तिम्रो हैन र” यात स्वकुमितय्सं उलि मययेकलसा व धुंकाः आर्यन अधिकारीया रिलिज जूगु “बटरफ्लाइ” व “बाँध मायाले” ला बांमलाक हे फ्लप जुल । मरिष्का पोखरेलया नं “चपली हाइट २”व “साली कस्को भेनाको” थेंज्याःगु फिल्मया हालत नं व हे जुल । “बाँध मायाले” फिल्मय् आर्यन अधिकारीलिसे हिरोइन जुयाः म्हितूम्ह हिरोइन सृष्टि श्रेष्ठया डेब्यू फिल्म “गाजलु” तसकं लोकंह्वाःगु, बनेज्या ताःलागु फिल्म खः ।

थ्व फिल्मय् वयागु ज्याया नं तारीफ हे जुल । गुलिखे फिल्म अवार्डय् सृष्टि श्रेष्ठयात बेस्ट न्यूकमरया सिरपाः नं वल । नेपाःया फिल्म ख्यःया यङ्ग सुपरस्टार धकाः बय्बय् यानातःम्ह अनमोल के.सी.या मेन लीड रोल दुगु “गाजलु” धुंकाः सृष्टिया “रोमियो एन मुना” व “बाँध मायाले” पिहां वल अले फ्लप जुल । व धुंकाः सृष्टि अनवं थनवं मदयेक तन ।

थन थःगु डेब्यू फिल्मय् बय्बय् जूपिं गुलिखे हिरो वा हिरोइनत थथे तनावंगु यक्व हे दु । ल्याःखानां साध्य हे जुइमखु । थ्व प्यदँ न्यादँया दुने कलिउडय् दुहां वःपिं हिरोत मध्ये प्रदिप खड्का, पल शाह, पुष्पल खड्का व अनमोल के.सी. अले हिरोइनत मध्ये साम्राज्ञीराज्य लक्ष्मी शाह छम्हेसिया हे जक अभिनय यात्रा निगू स्वंगू फिल्मसिबें अप्वः न्ह्याः वनाच्वंगु दु ।

थौंकन्हय् खँय्भाय्या फिल्मय् थुलि न्हूपिं हिरो हिरोइनत वयाच्वंगु दु कि ल्याःखानां साध्य हे मजुइ धुंकल । हाकनं थथे पलाः न्ह्याकीपिं गुलिखे हिरो हिरोइनतय्सं थः कलिउडया भविष्यया स्टार हे धकाः तकं धक्कु त्वःतेगु याना वयाच्वंगु दुसा गुलिसितं धाःसा मिडियां बय्बय् याना वयाच्वंगु दु ।

विशेष यानाः अनमोल के.सी. छम्ह बाहेक अझ मेपिं हिरोत प्रतिया स्वकुमिया नुगः उलि क्वसाये फुगु खनेमदुनि । अनमोल लिसे फिल्मय् डेब्यु याःपिं हिरोइनतय्गु यात्रा नं थःपिनिगु न्हापांगु फिल्म धुंकाः उलि न्ह्याःवने फुगु मदु । “होस्टेल”या प्रकृति श्रेष्ठ, “जेरी”या आना शर्मा, “कृ”या अदिति बुढाथोकी नं थथे थःगु डेब्यु फिल्म धुंकाः तनावंपिं खः ।

“कृ” पिहां वये न्ह्यःतक आदिति बुढाथोकी धयाम्ह बलिउड धयातःगु हिन्दी फिल्मख्यलं तकं पत्याः यानातःम्ह धकाः बय्बय् यानातःम्ह हिरोइन खः । आः “कृ” फिल्मं बजाः कायेमफुबलय् कलिउडं ला आदिती तंगु हे जुलसा बलिउडय् नं वं छुं यानाच्वंगु दु थें खनेमदु । थथे थःगु अभिनय यात्रायात छगुलिं निगूस्वंगूतक जक वा छगुलिं हे क्वचायेकाः तनावंपिं मध्ये झी नेवाः फिल्मया निम्ह साप हे लोकंह्वाःपिं हिरोइनत आशिष्मा नकःमि व भिन्तुना जोशी नं लाः ।

भिन्तुनां “भ्रम”य् हिरोइन जुया म्हितलसा “मेघा”य् नम्रता श्रेष्ठलिसे सेकेण्ड लिडय् म्हितल । थ्व धुंकाः वयागु कलिउड यात्रा न्ह्याःमवनसा आशिष्मा नकःमिं धाःसा “अन्तराल”, “तोरी लाहुरे”, “लभ यु बाबा”, “संरक्षण”, “राधे” नापं यानाः छगू दर्जनति खँय् भाय्या फिल्म म्हितल । वयागु “अधकट्टि” नांयागु फिल्मया चर्चा ला बांलाक्क हे जुल अले निखिल उप्रेती हिरो दुगु “राधे” ला सेमी हिट फिल्म हे खः ।

अय्सां छम्ह हिरोइनया रुपय् वयागु यात्रा धाःसा उलि ताःलाये मफुत ।थौंकन्हय् खँय्भाय्या फिल्मय् थुलि न्हूपिं हिरो हिरोइनत वयाच्वंगु दु कि ल्याःखानां साध्य हे मजुइ धुंकल । हाकनं थथे पलाः न्ह्याकीपिं गुलिखे हिरो हिरोइनतय्सं थः कलिउडया भविष्यया स्टार हे धकाः तकं धक्कु त्वःतेगु याना वयाच्वंगु दुसा गुलिसितं धाःसा मिडियां बय्बय् याना वयाच्वंगु दु ।

अनमोल के.सी.यात कयाः “होस्टेल” दयेकूम्ह प्रोड्युसर सुनिल रावलं “होस्टेल रिटन्र्स” दयेकूबलय् उकी सुशील श्रेष्ठ नांयाम्ह न्हूम्ह हिरोयात डेब्यु याकल । स्वयेबलय् अनमोल थें हे ख्वाःवःम्ह सुशील श्रेष्ठया डेब्यू बांलाक्क हे जूसां वयाः यात्रा धाःसा “कारखाना” व मेगु छगू निगू फिल्मय् हे जक तक्यन ।

अनमोल के.सी.या मां सुष्मिता बमजनं प्रोड्युस याःगु “म त तिम्रै हुँ” फिल्मय् थः काय्यात हे हिरो दयेकेगु ग्वसाः ग्वःगु खः, तर अनमोलं थःगु फिल्मया निंतिं ई फ्याये मफुबलय् आकाश श्रेष्ठ नांयाम्ह न्हूम्ह हिरोयात अनमोल के.सी.या रिप्लेस कथं न्ह्यःनेहल । थ्व फिल्म ला चले मजुल तर आकाशयात धाःसा आपाःसिनं ययेकल ।

व धुंकाः आकाशं साम्राज्ञी राज्यलक्ष्मी राणालिसे “तिमिसँग” व पुजा शर्मा लिसे “ रामकहानी” फिल्मय् हिरो जुयाः म्हितल । थ्व निगुलिं फिल्मया बनेज्या ठिकठाक हे जूबलय् वयात थःगु फिल्मय् म्हितकीपिनिगु ल्याः धाःसा अप्वया वयाच्वंगु दु । आः वयागु थ्व यात्रा गुलि पुलां जुइ , व धाःसा लिपा हे जक सीदइ ।

न्हू वःपिं हिरोत मध्ये बय्बय् जुयाच्वंपिं निम्ह धइपिं आयुष्मान देशराज श्रेष्ठ व आशिरमान देशराज श्रेष्ठ नांया निम्ह दाजुकिजापिं खः । दाजुकिजा मध्ये दाजुम्ह आयुष्मानया पलाः धाःसा कलिउडय् क्वातुइ धुंकूगु खनेदु । उकिसनं कलिउडय् थौंकन्हय्या स्टार हिरोइन कथं कयातःम्ह प्रियका कार्कीलिसेया मतिना व ईन्गेजमेन्टया कारणं वयागु चर्चा अप्वयाच्वंगु दु तर किजाम्ह आशिरमानया पलाः क्वातुइ फुगु मदुनि ।

अनमोल के.सी.यात कयाः “होस्टेल”, “जेरी” व “गाजलु” थेंज्याःगु लोकंह्वाःगु फिल्म दयेकूम्ह निर्देशक हेमराज बि.सी.या निर्देशनय् दयेकूगु “ग्यांगस्टर ब्लुज” फिल्मय् नं निर्देशक बिसीं अनमोलयात हे लीड रोल म्हितकेगु ग्वसाः ग्वःगु खः । अनमोलं नं ज्यू हे धाःगु खः तर लिपा वनाः थ्व फिल्मया निंतिं ई फ्यायेमफुबलय् अनमोलया रिप्लेस कथं आशिरमानयात डेब्यू याकूगु खः ।

तर थ्व फिल्म नं उलि चले मजूबलय् किजाम्ह आशिरमानया पलाः सुथां लायेमफुत । आः आशिरमानया भविष्य वयागु न्हूगु फिल्म “द ब्रेकअप” या भरय् लानाच्वंगु दु । कलिउडय् राजेश हमाल, निखिल उप्रेती थेंज्याःपिंत पुलां जुल धकाः धयाहःगु इलय् खनेदयेकः वःपिं राजबल्लभ कोइराला, जीवन लुइँटेल व आर्यन सिग्देलपिं मध्ये आर्यन सिग्देल छम्हेसिया जक पलाः सुथां लाःगु खनेदतसा मेपिं हिरोत ला विदेशय् हे पलायन जुल ।

लिपांगु इलय् तसकं बय्बय् जूपिं मध्ये “ऐश्वर्य” फिल्मं डेब्यू याःम्ह हिरोइन दिपिका प्रसाई अले “लिलिबिलि”या हिरोइन जसिता गुरुङ्गयात नं कलिउडया राईजिङ्ग स्टारया रुपय् चर्चा याःगु खः । जसिताया यात्राय् आः “लभ स्टेशन” नांयागु छगू चर्चित फिल्म वयेत्यंगु दुसा दिपिकाया धाःसा “छक्का पन्जा ३” बाहेक मेगु फिल्म मदुनिगु जक मखसे वं आः थःगु पलाः फिल्मपाखे मन्ह्याकीगु संकेत खनेदयावःगु दु ।

दिपिकां छुं ई न्ह्यःतिनि “ऐश्वर्य” फिल्मया हे निर्देशक दिवाकर भट्टराईलिसे ईन्गेजमेण्ट याःगुलिं यानाः आवंलि वं फिल्म मम्हितीगु संकेत ब्वलंगु खः । थुकथं कलिउडय् थ्व निदँप्यदँया दुने खनेदयेक्वःपिं आपालं हिरो हिरोइनतय्गु पलाः उलि थातय् लाये फयाच्वंगु खनेमदु धकाः धायेमाः ।

 

सम्बन्धित बुखँ

LEAVE YOUR COMMENTS