ख्यालि न्हिली

साहुं थःम्ह छम्ह कर्मचारीयात थःगु प्राइभेट अफिसय् सःताः धाल— ‘रामप्रकाश, जिं खनाच्वना कि जिमि दक्वं कर्मचारीत मध्ये छ दकलय् अप्वः योग्य व दकलय् अप्वः मेहनत याइम्ह कर्मचारी जूगु दु । जिं मेपिं सुं कर्मचारीं नं छं ति लगनशील जुयाः ज्या याःगु मखना । छं गबलें छुं गल्ति याइमखु ।

अले बाचा बाचा तक ओभर टाइम मफ्वंसे हे कम्पनीया ज्या यायेगु यानाच्वंगु दु । कम्पनीप्रति छंगु थ्व निष्ठा व वफादारीया जिं तारिक याना ।’
रामप्रकाशया मिखाय् गर्वया चमक वल । मालिकं वयागु तारिफ यानाच्वंगु जुसेंलि जरुर वयागु प्रमोसन जुइ, अले वयागु तलब अप्वयेका बीगु जुइ ।
‘अथे जूगुलिं रामप्रकाश’— साहुं थःगु खँ पूवंकल— ‘इच्छा मदयेक मदयेक नं जिं छंत जागीरं लिकयाच्वना । छाय्कि छ थेंज्याःपिं मनूतय्सं हे ज्या दक्वं सयेकाः कम्पनीयागु हे कम्पिटिशनय् बिजनेश शुरु यानाबी ।’