खोपया लागिं जूगु ट्यांकर हडताल क्वचाल

येँ – थःपिंत कोरोना विरुद्धया खोप बीमाःगु माग यासें आन्दोलन याना वयाच्वंपिं ट्यांकर चालकतय्त सरकारं खोप बीगु सहमति यायेवं म्हिगः निसें आन्दोलन बन्द जूगु दु ।
नेपाल आयल निगम व नेपाल पेट्रोलियम ट्यांकर चालक संघ दथुइ जूगु वार्ता लिपा ट्यांकर चालकयात थनिंनिसें खोप बीगु सहमति जूगु खः । सहमति कथं बलम्बुइ च्वंगु एपीएस अस्पतालय् थनिंनिसे चालक व सहचालकपिंत खोप बीगु जुइ ।

आः बागमति प्रादेशिक डिपो कार्यालय थानकोटपाखें ट्यांकर चालक व सहचालकयात निगमया म्हसीकापौया लिधंसाय् खोप बीगु ज्या जुइ । थानकोट डिपो व अनं प्रदेशन्यंक पेट्रोलियम पदार्थ ढुवानी याइपिं गुसःम्ह चालक व सहचालकं कोरोना विरुद्धया खोप कायेफइ । उकथं हे अमलेखगञ्जया १४०० म्ह चालक व सहचालकतय्सं नं खोप काये खनी ।
नेपाल पेट्रोलियम ट्यांकर चालक संघय् आवद्ध चालक व सहचालकतय्सं खोपया लागिं वंगु छुं न्हि न्ह्यवंनिसें आन्दोलन याना वयाच्वंगु खःसा थःपिंत खोपया व्यवस्था मजुल धाःसा पेट्रोलियम पदार्थ ढुवानी ठप्प यायेगु ख्याच्वः बियाच्वंगु खः ।

नेपाल पेट्रोलियम ट्यांकर चालक संघया अध्यक्ष ईश्वर लामां पेट्रोलियम पदार्थ अत्यावश्यक सेवा खः धकाः थःपिसं सिउ, अय्नं म्वायेगु निंतिं सेवा दिकाः आन्दोलन यानाच्वनागु खँ धयादीगु दु ।
चालकतय्गु उगु आन्दोलनयात पम्प सञ्चालकतय्सं नं समर्थन याःगु दु । थःपिंसं नं खोपया निंतिं सरकारयात तःक्वःमछि धयां नं सरकारं चिउताः मतः धासें नेपाल पेट्रोलियम डिलर्स राष्ट्रिय एशोसिएसनं चालक व सहचालक लगायत पेट्रोल पम्पयात नं खोपया व्यवस्था यायेत माग याःगु दु ।