ख्याच्वः लिपा थ्री गर्जेज थासय् वल

येँ – लगानी बोर्डं सम्झौता खारेज यायेगु ख्याच्वः बियाः पौ च्वयेवं पश्चिम सेती जलविद्युत आयोजना दयेकेगु निंतिं चिनियाँ कम्पनी थ्री गर्जेज सकारात्मक जूगु दु । थ्व स्वयां न्ह्यः पीपीए दर थःपिंत चित्त बुझे मजू धासें थ्री गर्जेजं पीपीए दर हिलेमाःगु दबाब बिया वयाच्वंगु खः । पौ च्वयेवं वंगु आइतवाः थ्री गर्जेजं लगानी बोर्डलिसे सहलह याःगु दुसा सोमवाः नेपाल विद्युत प्राधिकरणलिसे सहलह याःगु दु । थ्री गर्जेज आः प्राधिकरणं क्वःछिउगु भावय् हे आयोजना न्ह्याकेत तयार जूगु दु । प्राधिकरणं पीपीए दर सुख्खा यामय् (मंसिर १६ निसें जेठ १५ तक) १२.४० तका व वर्षा यामय् (जेठ १६ निसें मंसिर १५ तक) प्रतियुनिट ७.१० तका क्वःछिउगु खः ।

उगु आयोजना दयेकेत १ खर्ब ६० अर्ब तका तुइगु अनुमान दु गुकी ६५ प्रतिशत थ्री गर्जेजं लगानी याइसा २५ प्रतिशत प्राधिकरणं व १० प्रतिशत आयोजना प्रभावित स्थानीय जनतां लगानी याइ । स्रोतया कथं लगानी बोर्डं थ्री गर्जेजयाके कार्ययोजना फ्वंगु दु । थ्री गर्जेजं आयोजना थःगु ल्हातय् लाकाः ज्या धाःसा मयाइगु खःला धइगु शंका वनाः वयागु कार्ययोजना माग याःगु खः ।