लगातारया वां मेलम्चीइ क्षति शुरु

येँ – वंगु छुं न्हि न्ह्यवंनिसें मदिक्क वा वयाच्वंगुलिं मेलम्चीया स्थानीय जनता आतंकित जूगु दु । थगुने तसकं वा वयाः खुसिबाः वःगु जुयाः थुगुसी नं

अथे हे खुसिबाः वइ धकाः स्थानीय मनूत त्रसित जूगु खः ।
आः निन्हु स्वन्हु वा वयेवं हे मेलम्ची खुसि बाः वयाः दछि न्ह्यः दयेकूगु कल्भर्ट चुइकेगु शुरु जुइधुंकूगु खँ धाःगु दु । मेलम्ची वारपार यायेत दयेकातःगु ताँ खुसिं चुइकेवं अन २२ पु ह्युम पाइप तयाः गाडी वने जीक कल्भर्ट दयेकूगु खः । अन ताँ दयेकेगु लागिं सरकारं छुं चिउताः मतःगु खँय् स्थानीय मनूत तम्वयाच्वंगु दु । आः वह कल्भर्ट नं धमाधम चुइकेगु शुरु जूगुलिं थ्व नं पूरा हे चुइकीगु खः लाकि धकाः चिन्ता जुयाच्वंगु खँ धाःगु दु ।

मेलम्चीया च्वय्पाखे अझ नं फुसफुस चलः वनाच्वंगुलिं हानं नं ल्वहंत चुइका हयेफुगु अनुमान यासें मेलम्ची परियोजनां सुरुङया लुखा तिना बीधुंकूगु दु । सुरुङ बन्द याःगुलिं येँय् मेलम्चीया लः वयेगु नं बन्द जुइधुंकूगु दु ।

अथे हे वंगु छुं ई न्ह्यवंनिसें लगातार वा वःगुलिं मनाङय् नं हानं खुसिबाः वइगु खः लाकि धकाः स्थानीय मनूत चिन्तित जूगु दु । थगुनेया खुसिबालं मनाङया लँ यक्व थासय् चुइकूगु खः ।

थुगुसी वःगु खुसिबालं येँय् नं चिचीधंगु खुसिबाः वयाः मनू व मोटरसाइकल समेत चुइका यंकाच्वंगु दु ।