ने. सं. ११४३ चौलाथ्व पारू -

मेलम्ची ठेकेदारं बिउगु चेक बाउन्स

येँ – मेलम्ची खानेपानी आयोजनाया विदेशी ठेकेदार सीएमसीं सहायक ठेकदारतय्त बिउगु चेक बाउन्स जुयाच्वंगु खँ सीदुगु दु । सरकारं आयोजनाया ठेक्का रद्द यायेगु लिसें धरौटी जफत यायेवं सीएमसीया खाता रोक्का जूगुलिं चेक बाउन्स जुयाच्वंगु खः । चेक बाउन्स जुइवं आः थःपिनिगु ध्यबा सरकारं बीमाःगु माग ठेकेदार व कर्मचारीतय्सं यानाच्वंगु दु ।

सीएमसीं आयोजना त्वःतेवं अन ज्या यानाच्वंपिं च्यासः कर्मचारीया तलब नं रोक्का जुयाच्वंगु दु । उमित कम्पनीं च्यागू करोड स्वयां अप्वः दां पुलेमानिगु खँ कर्मचारीतय्सं धाःगु दु । मेलम्ची आयोजनाय् नेपाःमि, भारतीय व इटालियन कर्मचारीतय्सं ज्या याना वयाच्वंगु दु ।
अथेहे आयोजनायात माःगु सामान आपूर्ति याइपिं नेपाली ठेकेदारं नं सीएमसीयात ज्याय् लित सःतेत वा थःपिनिगु काये ल्यं दनिगु ध्यबा सरकारं पुला बीत माग यानाच्वंगु दु ।

तर सरकारं ठेकेदारया मागया बारे छुं निर्णय धाःसा याःगु मदुनि । ठेकेदारतय्सं आः सीएमसी लिसेया ठेक्का रद्द यानाः न्हूगु कम्पनीयात ज्या याकेगु खःसा थप निदँ ई काइ धासें फयांफछि सीएमसीयात हे लित सःतेत नं माग याःगु दु । थौंकन्हय् मेलम्चीया २७ किलोमिटर सुरुङ मध्ये १५०० मिटर जक फिनिसिङ याये ल्यं दनि ।

मेलम्चीया ज्या क्वचायेत्यंगु इलय् इटालियन कम्पनीं थःपिनिु कम्पनी ताथ जूगु धासें ठेक्का रद्द यायेगु प्रस्ताव तःगु खः । लिसें सीएमसीं आयोजनाया लागत अप्वःगुलिं छुं भचा ध्यबा थप यायेमाःगु माग नं याना वयाच्वंगु खः । सरकारं नं आः सीएमसीयात हे लितः सःतेत वार्ता शुरु याःगु खँ सीदुगु दु ।