निगुलिं पक्षं आयोगय् दावी, निम्हेस्यां लिसः स्वयाः जक आयोगं निर्णय बीगु
येँ (नेपालभाषा टाइम्स) – विभाजित नेकपाया निगुलिं पुचलं पार्टी व चुनाव चिं दावी यासें निर्वाचन आयोगय् लिसः छ्वःगु दु। तर आयोगया प्रवक्ता राज कुमार श्रेष्ठं उकी च्वयातःगु विवरण बारे धाःसा छुं धाःगु मदुनि ।
ओली पुचःया नेता सुवास नेम्वाब आयोगय् वनाः थःपिनिगु पौ लःल्हाःगु खः । वय्कलं सञ्चारकर्मीलिसे खँ ल्हासें आयोगं माग याःगु भ्वं व न्यंगु न्ह्यसःया लिसः बियागु खँ धयादीगु दु। मेगु पुचःया नेता लिलामणि पोखरेलं धाःसा थःपिंसं बीमाःगु विवरण न्हापा हे बीधुनागु जानकारी पौ जक बियागु खँ धयादीगु दु। आयोगं पुस २३ गते निगुलिं पुचःयात राजनीतिक दल सम्बन्धी नियमावलीया नियम २५ कथं न्हय्न्हुया दुने विवरण पेश यायेत निर्देशन बिउगु खः । आयोगं क्वःछिनातःगु म्यादया अन्तिम न्हि कुन्हु निगुलिं पुचलं लिसः छ्वःगु खः । आः आयोगं निगुलिं पुचःया विवरण स्वयाः निर्णय बीगु खँ धाःगु दु ।
सीदु कथं प्रधानमन्त्री केपी शर्मा ओलीं छ्वःगु पती थःगु पार्टी आधिकारिक जूगु दावी धासें मेपिंसं छ्वःगु अभिलेखीकरण यात धाःसा आयोगं हे पार्टी एकता भंग याःगु घोषणा याये माली धयातःगु दु । ओलीया ११ पृष्ठ ताःहाकःगु पती धयातःगु दु, ‘पुष्पकमल दाहाल समेतं आयोगय् पौ च्वयाः पार्टी विभाजनया ल्याखं पत्राचार याःसां नं नेपाल कम्युनिष्ट पार्टी (नेकपा) विभाजन जूगु मदु, व मखु ।’
पार्टीया न्हापांम्ह अध्यक्षया नातां पार्टी एकीकरणया मर्म कथं व विधान कथं नीस्वंगु केन्द्रीय कमिटीइ प्रचण्ड निम्हम्ह अध्यक्ष व माधव नेपाल वरिष्ठ नेता जूगु खँ नं पती धयातःगु दु। प्रचण्ड-माधव पुचलं पेश याःगु माइन्युटय् हस्ताक्षर याःपिं मध्ये अप्वःस्यां थम्हं सःतागु बैठकय् हस्ताक्षर याःगु दावी नं यानातःगु दु। पार्टीया न्हापांम्ह अध्यक्ष थः हे जूगुलिं थः हे आधिकारिक जूगु दावी नं उकी यानातःगु दु ।
थ्वहे झ्वलय् पुलांम्ह प्रमुख निर्वाचन आयुक्त नीलकण्ठ उप्रेतीं आयोगयात उपलब्ध याकूगु केन्द्रीय दुजः व पदाधिकारीया बहुमतया आधारय् नेकपा वैधानिक जुइगु खँ धयादीगु दु। छगू टेलिभिजन ज्याझ्वलय् न्ववासें वय्कलं थःगु आधिकारिक परिचय पत्रसहित वःपिं केन्द्रीय सदस्यया बहुमत गन दु वं हे नेकपाया नां, चुनाव चिं व ध्वाँय् काये दइगु कानुनी प्रक्रियाव प्रचलन दुगु खँ कनादीगु दु ।
वय्कलं निर्वाचन आयोगय् दर्ता याकूगु विवरणय् ४४१ म्ह केन्द्रीय दुजः दुगु व उकी सुयागु बहुमत दु वहे आधिकारिक जुइगु खँ नं धयादीगु दु। प्रचण्ड-नेपाल पुचलं थ्व ४४१ म्ह केन्द्रीय दुजः मध्ये थःपिंके २ ९५ म्ह दुगु दावी याना वयाच्वंगु दु। ओली पक्षं धाःसा केन्द्रीय दुजः १५०२ म्ह सदस्यीय दयेकूगु दुसा उकियात हे थःपिनिगु आधिकारिक केन्द्रीय समिति खः धकाः दावी यानाच्वंगु दु ।
LEAVE YOUR COMMENTS