शहीदया लुमन्तिइ कराते कासा जुइगु

ख्वप –  ख्वप नगरपालिकाया ग्वसालय् थ्व हे वइगु फागुनया न्हापांगु वालय् अन्तर नगर कराते कासा जुइगु जूगु दु । नगरपालिकां थ्व हे वइगु फागुन ५ गतेनिसें ८ गते तक प्यन्हुयंकं अन्तर नगर कराते कासाया ग्वसाः ग्वयेत्यंगु खः । वि.सं. २०४६ सालया जन आन्दोलनय् सहादत प्राप्त याःपिं वीर शहिदया लुमन्तिइ नगरपालिकां कराते कासा यायेत्यंगु खः ।

नपापाखें पत्रकार सम्मेलन यासें बिउगु जानकारीकथं आतकया दुने झिंन्हय्गू नगरपालिकां ब्वति कायेगु निंतिं नां दर्ता याये धुंकूगु जानकारी बिउगु दुसा छुं दिंया दुने थप नगरपालिकां नं ब्वति कायेत नां दर्ता याये फइगु खँ धाःगु दु ।

ख्वप नगरपालिकाया हे सभा हलय् जूगु पत्रकार सम्मेलनय् बिउगु जानकारीकथं आतकया दुने ख्वप नगरपालिकालिसें येँ व यल महानगरपालिका, पन्ति, पाँचखाल, भ्वत, धनकुटा, मध्यपुर थिमि, चाँगुनारायण, सूर्यविनायक, दाङया घोराही व पर्सा नगरपालिका लगायतं ब्वति कायेगु निंतिं नां दर्ता यायेधु.कूगु जानकारी बिउगु दु ।

थुकी ख्वप नगरपालिकाया निगू पुचलं ब्वति काइगु जूगु दु । कासाय् मिसा व मिजंया न्यागू तौल समूहया निंतिं मुक्कं निगू लाख नीद्वः तकाया सिरपाःया व्यवस्था यानागु नं जानकारी बिउगु दु ।

पत्रकार सम्मेलनय् ख्वप नगरपालिकाया प्रमुख सुनील प्रजापतिं कासा ख्यःया निंतिं नगरपालिकां थुगुसी १ गू करोड ८० गू लाख विनियोजन यानागु जानकारी बियादिल । उपप्रमुख रजनी जोशीं नेमकिपाया घोषणापत्रकथं थःपिं जनप्रतिनिधिइ निर्वाचित जुया वये धुंकाः सुरक्षित समाज निर्माण यायेगु ज्याय् लगे जुयाच्वनागु जानकारी बियादिल ।

 

सम्बन्धित बुखँ

LEAVE YOUR COMMENTS