जटिल जूवंगु भेनेजुएला प्रकरण
संयुक्त राष्ट्र संघया स्थापना लिपा नं पटक पटक थीथी देसय् अमेरिकी साम्राज्यवादया हस्तक्षेपया घटनां लिसा कयाच्वंगु दु । आः नं दक्षिण अमेरिकी मुलुक भेनेजुएलाय् अमेरिकी सम्राज्यवादया आक्रमणया कारणं अशान्ति न्यनाच्वंगु दु । छगू इलय् अमेरिका धायेवं ग्याइगु स्थिति ब्वलंगु खः ।
खास यानाः निगूगु विश्वयुद्धया इलय् अमेरिका त्यायेवं आः अमेरिकायात सुं नं प्रतिस्पर्धी देय् मदये धुंकल धइगु तकं महसुस जूगु खः । तर ई सदां छगू हे कथं न्ह्याइगु मखु जुयाच्वन । न्हापांगु विश्वयुद्ध व निगूगु विश्वयुद्धया इलय् अमेरिका तसकं शक्तिशाली जूसां आः बुलुहँ बुलुहुँ अमेरिकी साम्राज्यवादयात आणविक हतियार व सिद्धान्तय् नं उलि हे हाथ्या बीफुगु देय््त विश्वय् खने दया वयेधुंकाः धाःसा अमेरिकायात छगू ल्याखं हैकमवादय् अटल जुयाच्वनेगु अवस्था मदये धुंकूगु खनेदु ।
गबले भेनेजुएलाय् अमेरिकी सैनिक हस्तक्षेप शुरु जुल । आः विश्वया न्यायप्रेमि जनतां गुगुं नं हालतय् भेनेजुएला थेंज्याःगु सार्वभौमसत्ता सम्पन्न देसय् अमेरिकी हस्तक्षेप जुइ मजिउ धइगु सः नं थ्वयेकाच्वंगु दु । थ्व झ्वलय् नेपालय् नं उकिया कडा विरोध यानाः सभा जुलुस न्ह्यानाच्वंगु दु ।
छगू सार्वभौमसत्तासम्पन्न देसय् विदेशी हस्तक्षेप धइगु तानाशाही व अतिक्रमण खः धइगु वाःचायेकाः संयुक्त राष्ट्र संघया महासचिव एन्टोनिओ गुटरेलं नं वक्तव्य पिथनाः अनावश्यक हस्तक्षेप पनेत अमेरिकी राष्ट्रपति डोनाल्ड ट्रम्पयात इनाप यानादीगु दु । राष्ट्र संघया महासचिवं उगु इनाप मेमेगु थासं प्रशारण जुइगु सञ्चार माध्यमं मखुसें अमेरिकी सरकारया प्रायोजित सञ्चार माध्यम भ्वाइस अफ अमेरिकालिसे खँ ल्हायेगु झ्वलय् कनादिल ।
महासचिव गुटरेलं दक्षिण अमेरिकी देय् भेनेजुएलाय् गुगुं नं कथंया सैनिक हस्तक्षेप जुइ मजिउगु खँ स्पष्ट यानादीगु खः । तर अमेरिका छगू सुं नं देय्या सार्वभौमसत्ता स्वयां थःगु हे देय्या हैकम कायम यानाः विश्वया न्ह्यःने थः हे जक न्ह्यःने लायेत स्वयाच्वंगु देय् खः । उकिया कारणं हे थाय् थासं अमेरिकी सैनिक थौं लित यंकेमाःगु अवस्था ब्वलनाच्वंगु दु ।
खय्त ला विश्वय् निगूगु विश्व युद्ध लिपा शान्ति सम्झौता जुल वा अमेरिकाया हे पक्षय् आपालं देय् वने धुंकाः राष्ट्र संघ स्थापना नाप नापं विश्व शान्तिया लागिं पहल जुल धाःसां थन दुनं दुनं धाःसा अशान्तिया स्थिति कायम हे जुयाच्वंगु दु । गबले तक अमेरिकां थःगु हैकम थीथी देसय् कायम यायेगु रणनीति हिइकी मखुनि अबले तक थन वास्तविक शान्ति नं कायम याये फइ मखुनि ।
थ्व इलय् मडुरो सरकार नं शान्ति सम्झौता यायेत वार्ताया लागिं तयार जुयाच्वंगु खँ धयाच्वंगु दु । थ्व ल्याखं युद्धया नापनापं शान्ति सम्झौता जुइगु सम्भावना नं उलि हे खने दयावःगु दु ।
इराकय् अमेरिकी आक्रमण, अफगानीस्तानय् अमेरिकी हस्तक्षेप व लिवियाय् सैनिक गतिविधियात स्वस्वं वनेगु खःसा अमेरिका छगू विश्वया नामुद साम्राज्यवादी देय् हे खः, विश्वयात अशान्त यानाच्वंगु देय् अमेरिका हे खः धइगु स्पष्ट जू । अथे खःसां थांै अमेरिकां थःगु रणनीति वा धारणा हीकाः समानता, न्याय व अनुशासन कायम याये धइगु भावना भ्याः भचा हे क्यनाच्वंगु मदु ।
विश्वया थीथी स्वतन्त्र राष्ट्रत अथे जुयाः नं गिद्ध खनाः ग्याना जूम्ह बिरामी द्वहँंसाचा थें जुयाच्वंगु खः । खय्त ला थौं अमेरिकी सैनिक हस्तक्षेप जुइधुंकाः नं भेनेजुएलाय् उगु हस्तक्षेपया विकल्प तयार जुयाच्वंगु दु धकाः तःक्वःमछि हे अमेरिकी राष्ट्रपति डोनाल्ड ट्रम्पं न्ववाये धुंकूगु दु । भेनेजुएलाय् सैनिक हस्तक्षेपया विकल्प तयार जुयाच्वंगु दु धइगु खँ वयाच्वंगु इलय् हे संयुक्त राष्ट्र संघया महासचिव गुटरजं दक्षिण अमेरिकी देय् भेनजुएलाय् छुं नं कथंया सैनिक हस्तक्षेप जुइ मजिउ धइगु प्रतिक्रिया बियादीगु खः ।
छगू ल्याखं शान्तिया मू लक्ष्य सहित नीस्वंगु संयुक्त राष्ट्र संघं वक्तब्य मार्फत् थ्व धारणा न्ह्यब्वःगु कारणं विश्वया गुलिं राष्ट्रत आः नं निरिह जुयाच्वनेमाःगु अवस्थां ढुक्क जूगु दु । तर सुयातं टेरे मयाइम्ह अमेरिका वा अमेरिकी साम्राज्यवादी शक्तिं आः नं संय्ुक्त राष्ट्र संघयात नां जकया संयुक्त राष्ट्र संघ यानाः थःपिनिगु देय्या निर्णययात हे समर्थन व बल अप्वयेकेगु ज्याय् छ्यलीगु नं आपालं सम्भावना दु ।
म्हिगः नं इराक, इरान, अफगानिस्तान व लिवियाय् आक्रमण याःगु इलय् राष्ट्र संघ निरीह जुयाः अमेरिकां याःगु आक्रमणयात स्वयाच्वंगु खः । उकिं नं अमेरिकी साम्राज्यवादया न्ह्यःने राष्ट्र संघ छुं नं मखु । खय्त ला ल्याटिन अमेरिकाय् विदेशी हमला धइगु इतिहासया खँ खः । न्हापा न्हापा थज्याःगु आक्रमण तःगु देसं तःक्वःमछि हे फयेधुंकूगु नं खः ।
तर थ्व इलय् ल्याटिन अमेरिकी मुलुकत छथाय् हे च्वनाः अमेरिकी सम्राज्य विरुद्ध थ्वयेकाच्वंगु कारणं हस्तक्षेप जुइमखुत धइगु मनसायय् थ्यंगु खः । छगू ल्याखं छगू देय्यात हस्तक्षेप यायेवं मेगु देय्यात नं हस्तक्षेप यायेफु धइगु खँ सकसिनं सिउ । अमेरिकी सैनिक हस्तक्षेप लिपा भेनेजुएलाय् राष्ट्र संघं छ्वया बिउगु राहत सामग्रीयात नं अमेरिकां हतियार कथं प्रयोग याइगु सम्भावना अप्वया वनाच्वंगु दु ।
छगू ल्याखं पीडित जनतायात नयेगु, त्वनेगु व च्वनेगु वातावरण तयार यायेत छ्वया बिउगु सामग्री इनेगु हे झ्वलय् नं अमेरिकी साम्राज्यवादं कासा म्हिती धइगु खँ चायेकाच्वंगु दु । न्हापा न्हापा नं अमेरिकां मेमेगु देसय् आक्रमण याये धुंकाः यानाच्वंगु थथे हे खः । उकिं उकी सचेत यासें राष्ट्र संघं अमेरिकायात सचेत याःगु खः ।
थ्व इलय् अमेरिकां नं भेनेजुएलाया सिमानाय् राहत कथं खाद्य पदार्थ व वासः थ्यंकेगु यानाच्वंगु दु । उकियात तकं हतियार कथं प्रयोग यानाः थप भेनेजुएलायात स्यंकेत स्वयेफुगु संकेत दुगुलिं राष्ट्र संघं विज्ञप्ति हे पिथनाः उगु खाद्य सामग्री व वासःयात अमेरिकी साम्राज्यवादं हतियार कथं प्रयोग मयायेत आग्रह याःगु खः ।
संयुक्त राज्य अमेरिकां भेनेजुएलाय् हःगु उगु सामग्रीयात मडुरो सरकारं देय् दुने हयेत निषेध यानातःगु दु । थ्व इलय् मडुरो सरकार नं शान्ति सम्झौता यायेत वार्ताया लागिं तयार जुयाच्वंगु खँ धयाच्वंगु दु । थ्व ल्याखं युद्धया नापनापं शान्ति सम्झौता जुइगु सम्भावना नं उलि हे खने दयावःगु दु ।
थज्याःगु अवस्थाय् विश्व शान्तिया कामना यानाच्वनापिं झी नेपाःमि जनतां नं भेनेजुएलाय् अमेरिकी आक्रमणया विरोध याये हे माः । शान्तिया ख्वाःपाः पुनाः दुनं दुनं छुरां सुइगु ज्या अमेरिकी साम्राज्यवादं छुं नं देसय् याये पावे जुइमखु ।
विश्व शान्तिया कामना यानाः नीस्वनातःगु संयुक्त राष्ट्र संघपाखें न्यायोचित समाधान मालाच्वंगु थ्व इलय् ल्याटिन अमेरिकी देय्या न्यासःम्ह विख्यात व्यक्तित्वतय् बिहिवाः च्वंगु मुँज्यां निगुलिं देय्यात न्याय याइगु आशा याये ।
LEAVE YOUR COMMENTS