कांग्रेस सभापतिइ देउवा त्यात

येँ- नेपाली कांग्रेस सभापतिइ शेरबहादुर देउवा त्याःगु दु । देउवां कुल कुतुंवंगु ४५७४ मत मध्ये २७२४ मत कयाः सभापतिइ त्याकूगु खः । वयकःया प्रतिद्वन्द्वी शेखर काेइरालायात वयकःया स्वयां ९०७ मत म्हाे वःगु खः । काेइरालायात मुक्कं १८१७ मत वःगु खः

सभापति पदया निंतिं जूगु निगूगु चरणाया मतदानय् कुतु वंगु ४५७४ मतया अाधारय् सभापतिइ त्याकेगु निंतिं २२८८ मत दःसा गाः ।

कांग्रेसया विधान कथं महाधिवेशनय् कुतुंवंगु मतया ५० प्रतिशत मत वल धाःसा सभापतिइ विजय जुइ ।

येँ जुयाच्वंगु कांग्रेसया झिंप्यक्वःगु महाधिवेशनया न्हापांगु चरणया मतदानय् सभापतिइ दंपिं उम्मेदवारत शेरबहादुर देउवा, शेखर काेइराला, प्रकाशमान सिं, विमलनेन्द्र निधि व कल्याण गुरूङ सुनां नं ५० प्रतिशत मत हये मफयेवं दकलय् अप्वः मत हःपिं देउवा व काइराला दथुइ निगूगु चरणया चुनाव जूगु खः ।

देउवा झिंस्वक्वःगु महाधिवेशनय् नं निगूगु चरणया मतदान पाखें सभापतिइ विजयी जूगु खः ।