ने. सं. ११४६ चाैलागा त्रयोदशी - थिमि बालकुमारी जात्रा

कोरोना संक्रमितत ४ हजारं अप्वल, थप ३२३म्हेसित संक्रमण

येँ – नेपालय् ४ हजार स्वयां अप्व मनूतय्त कोरोना भाइरसया संक्रमण जूगु दु । स्वास्थ्य तथा जनसंख्या मन्त्रालयं नेपालय् संक्रमिततय् ल्याः ४ हजार ८५म्ह थ्यंगु जानकारी बिउगु दु । अथेहे वंगु नीप्यघौया दुन थप ३ सय २३म्ह थप संक्रमित जूगु दु । मन्त्रालयया प्रवक्ता डा. जागेश्वर गौतमया कथं न्हूपिं संक्रमित मध्ये २ सय ९२म्ह मिजंत खःसा ३१म्ह मिसात खः । नेपालय् थौं इलाम जिल्ला थप जूगु दु । थ्व नापं ७२गू जिल्लाय् कोरोनाया संक्रमण खनेदुगु दु ।

येँया राष्ट्रिय जनस्वास्थ्य प्रयोगशालाय् याःगु परीक्षणय् धनुषाया २४म्ह, कपिलवस्तुया ७म्ह, महोत्तरीया ३म्ह, नवलपरासी पश्चिमया २२म्ह, नुवाकोटया २म्ह, रौतहटया २१, सर्लाहीया १६म्ह व सिरहाया १२म्ह यानाः १ सय २५म्हेसित संक्रमण खनेदुगु दु । देय्या थीथी थासय् याःगु परीक्षणय् थप १ सय ९८म्हेसित संक्रमणया पुष्टि जूगु खः ।

अथेहे ९६म्ह मनूत कोरोनामुक्त जुया अस्पतालं डिस्चार्ज जूगु दु । आः तक अस्पतालं डिस्चार्ज जूपिं ५ सय ८४म्ह थ्यंगु दु ।