चिकुयाः कुहां वःपिं जन्तुत शिकार

येँ – वंगु छुं न्हि न्ह्यवंनिसें अप्वया वःगु चिकुं यानाः हुम्लाया हिमाली लागाय् च्वापु गायेवं अन सुलाः सुलाः जंगली वन्यजन्तुया शिकार याइपिं मनूत अप्वया वःगु दु । च्वय्पाखे तसकं ख्वाउँयाः च्वने थाकुगुलिं क्वय् बेँसीपाखें कुहां वःपिं वन्यजन्तुयात शिकार यायेगु ज्या उमिसं यानाच्वंगु खः ।

च्वय्या लागाय् च्वंगु जंगल च्वापुं झ्वाप्प त्वपुना बीवं अन च्वनीपिं मृग, कस्तुरी, घोरल थेंज्याःपिं जंगली जन्तुत क्वय् बेँसीपाखे च्वं वनेगु शुरु जूगु खः । उच्च हिमाली भेगय् ५ निसें ६ फिट तक च्वापु धीचिनेवं वन जंगल तुइसे हे च्वंक च्वापुं जायाच्वंगु दु । अज्याःगु इलय् क्वय् वःपिं जन्तुतय्त सुलाः शिकार याइपिं शिकारीतय्सं निशाना यानाच्वंगु खः ।

लिसें उगु लागाय् ब्वइपिं झंगःपंक्षीया शिकार नं आः अप्वया वःगु खँ धाःगु दु । चिकुलाबलय् झंगःपंक्षीया शिकार याये अःपुइगु जुयाः जंगलय् जाः प्यनेगु, अन्न ह्वलाः ज्वनेगु ज्या याइपिं मनूत अप्वयाच्वंगु खः । थुकी विशेष यानाः राष्ट्रिय पंक्षी डाँफे लिसें थीथी जातियापिं खातय्त शिकार यानाच्वंगु दु ।

मौसमया लबः कयाः पशुपंक्षीया शिकार याइपिं अप्वया वयेवं उमित नियन्त्रण यायेगु लागिं जिल्ला वन कार्यालयं सुरक्षाकर्मीयात खटे यायेधुंकूगु दु । थ्व झ्वलय् जिल्लाया फुक्क हे प्रहरी चौकीयात नं सतर्क अवस्थाय् तयेधुंकूगु खँ प्रहरी नायब उपरीक्षक रविन श्रेष्ठं कनादीगु दु ।

दँय्दसं हे थथे चिकुलाया इलय् चोरी शिकारीपिं अप्वइगु खः । थुमिं यानाः अन च्वनीपिं गुलिखे वन्यजन्तु लोप हे जुइगु अवस्थाय् थ्यंगु व गुलिं चाहिँ बाय् हिलाः मेथाय् च्वं वनाच्वंगु खँ नं वन कार्यालयं धाःगु दु ।

सम्बन्धित बुखँ

LEAVE YOUR COMMENTS