नक्कली नोट व नोट छ्यलीपिं ज्वन

यँे – महा–नगरीय प्रहरी परिसरं येँया थीथी थासं नक्कली नोट सहित न्याम्हेसित ज्वंगु दु । प्रहरीं उपिंपाखें २१ हजार तका बराबरया नक्कली नोट नं बरामद याःगु खः । नक्कली नोट छ्यलाच्वंपिं यल गोदावरीया मनोज केसी, आशिष माझी, नेमा तामाङ, धनुषाया रिजबहादुर श्रीनेत ठकुरी, भोजपुरया नियम राई व सोलुखुम्बुया भेषकुमार थापा मगरयात ज्वंगु खः । उमिपाखें न्यासः वंगु नक्कली नोट ३८ पाः व द्वःछि वंगु निपाः बरामद याःगु खः । येँया थीथी थासय् नक्कली नोट छ्यलाः सामान न्याइपिनि ल्याः अप्वया वनाच्वंगु सुराकीया आधारय् प्रहरी परिसरं अप्रेशन न्ह्याकूगु खः । ज्वंपिंसं बिउगु जानकारी कथं उगु नोट वीरगन्जं हःगु खः । वंगु छुं ई थुखे येँया थीथी बैंकय् समेत नोटया बण्डलय् नक्कली नोट स्वचाकाः हयेगु ज्या व्यापक जुया वयाच्वंगु दु ।