ने. सं. ११४६ अनलाथ्व पुन्हि -

चिनपिङया भ्रमण गुलि सफल?

नेपाः आपालं मुद्दाय् चुके जूगु विश्लेषकतय् दावी

येँ – चिनियाँ राष्ट्रपति सी चिनपिङ थःगु २१ घन्टा ताःहाकःगु नेपाः भ्रमण सिधयेकाः लिहां वनेवं वय्कःया भ्रमण गुलि सफल जुल व थुकिं नेपाःयात गुलि फाइदा दइगु जुल धइगु खँय् विश्लेषण शुरु जूगु दु । सरकारपाखें वय्कःया भ्रमणयात अभूतपूर्व रूपं सफल जुल धकाः दावी याःसां कुटनीतिक विश्लेषकतय्सं धाःसा थुकियात अथेभनं ‘अभूतपूर्व’ थ्यंक धाये मफइगु खँ धयाहःगु दु ।

राष्ट्रपति सीया भ्रमणया झ्वलय् आपालं भौतिक निर्माण व यातायात सम्पर्क बारे सम्झौता जूसां नेपालय् चिनियाँ लगानी दुकायेगु बारे छुं हे खँ मजूगुयात नेपाः चुके जूगु धइगु अर्थय् व्याख्या याना हःगु दु । थौंकन्हय् चीनं विश्वया आपालं देशय् लगानी यानाच्वंगु दु । तर नेपालय् लगानी यायेगु बारे धाःसा नेपाः सरकारं ठोस प्रस्ताव तये मफुगु खँ धयाहःगु दु ।

अथे हे भारतलिसे थें चीनलिसे नं नेपाःया व्यापार घाटा दँय्दसं अप्वया वनाच्वंगु दु । तर थुगुसी चिनियाँ राष्ट्रपतिया न्ह्यःने नेपालं व्यापार घाटा म्हो यायेगु बारे नं छुं प्रस्ताव तये मफुगु खँ विश्लेषकतय्सं धयाहःगु दु । नेपालं चीनपाखें दँय् २ खर्ब ५ अर्ब तकाया सामान आयात याइ । तर नेपालं चीनय् दुहां वनीगु सामान धाःसा तसकं कम जक दु ।

थ्व व्यापार घाटा म्हो यायेगु लागिं नेपाःया सामानयात चीनय् अप्वः थाय् बीकेगुपाखे नेपालं प्रस्ताव तयेमाःगु खँय् नं नेपाः चुके जूगु खँ धयाहःगु दु । चीनं नेपाःया आपालं लँ व भौतिक पूर्वाधारत दयेका बी धाःसां उकिया कार्यान्वयन पक्ष गुलि बल्लाइगु खः धइगु खँय् धाःसा न्ह्यसः ब्वलनाच्वंगु दु ।

चीनं दयेका बी धकाः टेण्डर लाका तःगु आपालं महत्वपूर्ण परियोजनात इलय् सिमधयाः अलपत्रय् लानाच्वंगु दु । उकिं आः चिनियाँ राष्ट्रपतिं दयेका बी धाःगु परियोजनात नं अज्याःगु हे हविगतय् लाइगु आशंका याना हःगु दु ।

उकथं हे चीनं येँय् दयेका बी धाःगु मोनोरेल बारे राष्ट्रपतिलिसे छुं खँ मजूगु नं नेपाः चुके जूगु अर्थय् व्याख्या याना हःगु दु । मोनोरेल दयेकगु पहल येँ महानगरपालिकां याःगु खःसां लगानी धाःसा संघीय सरकारं हे यायेमाः ।

भारतयात लिसः
राष्ट्रपति सी चिनपिङया थ्व भ्रमणया झ्वलय् अप्वः ध्यान नेपाःया यातायात सम्पर्कय् हे केन्द्रित जुयाच्वंगु दु । केरुङंनिसें येँय् तक रेलमार्ग दयेकेगु, सुरुङ मार्ग दयेकेगु व आः दुगु स्थलमार्गया लँयात नं सुधार यायेगु खँय् भ्रमण केन्द्रित जूगु दु । लिसें नेपाःलिसेया मेमेगु नाकात नं चायेकेगु खँ वःगु दु ।

चीनं थज्याःगु प्रस्ताव न्ह्यःने हयाच्वंगुया मू तात्पर्य नेपाःया लागिं प्रयोग याके बी धकाः प्रस्ताव यानातःगु प्यंगू बन्दरगाह तक अःपुक पहुँच दयेका बीगु खः ।

यदि चिनियाँ बन्दरगाह तक नेपाःया सहज पहुँच जुल धाःसा सम्पर्कया लागिं मुक्कं भारतलिसे जक निर्भर जुइमाःगु नेपाःया बाध्यता अन्त जुयाः चीनलिसे नं स्वापू जू वनीगु आशा यानातःगु दु । राष्ट्रपतिं नेपाःयात भूपरिवेष्टित मखु भूजडित याना बी धाःगु नं वहे कारणं खः धयाहःगु दु ।