मेलम्चीया ठेक्का सम्झौता २० गते रद्द याइगु

येँ – मेलम्ची खानेपानी आयोजना दयेकाच्वंगु इटालियन निर्माण कम्पनी सीएमसी लिसेया ठेक्का सम्झौता वइगु माघ २० गतेनिसें रद्द जुइगु जूगु दु । सीएमसीलिसेया ठेक्का रद्द जुइवं धरौतीया निंतिं तयातःगु २ अर्ब २१ करोड तका नं जफत जुइगु जूगु दु ।

आयोजनां माघ २० गते सीएमसीयात ठेक्का रद्द जूगु घोषणा सहित पौ च्वइगु खँ धाःगु दु । वयां लिपा आयोजना पूवंकेत मेगु प्रक्रिया न्ह्याकेगु खँ आयोजनां धाःगु दु । आयोजनां मेलम्ची क्वचायेकेगु निंतिं आः मेलम्चीइ ज्या यानाच्वंगु सहायक कम्पनीयात हे ज्या याकेगु तयारी यानाच्वंगु खँ सीदुगु दु ।

न्हूम्ह ठेकदारयात ज्या याकेबलय् अझ अप्वः ई काइगु जुयाः सहायक कम्पनीयात हे ज्या याकल धाःसा याकनं ज्या क्वचाये फइ धासें सहायक कम्पनीयात ज्या याकेगु तयारी यानाच्वंगु खँ सीदुगु दु । सीएमसी लिसे ठेक्का सम्झौता रद्द जुइधुंकाः आयोजनायात त्यासा बिउगु एशियाली विकास बैंकं आयोजनाया स्थलगत भ्रमण यायेधुंकूगु दु ।

अवलोकन लिपा बैंकं आयोजनायात माःगु थप त्यासा बीफइगु खँ धाःगु दु । मेखे प्रतिनिधि सभा विकास तथा प्रविधि समितिं मेलम्ची आयोजना क्वचायेकेगु निंतिं झिंन्यान्हुया दुने फास्ट ट्राय्क योजना बुझे यायेत निर्देशन बिउगु दु । समितिया म्हिगः च्वंगु बैठकय् खानेपानी मन्त्रालयया सचिव व आयोजनाया पदाधिकारीत लिसे सहलह यानाः थज्याःगु निर्देशन बिउगु खः ।