गणतन्त्र दिवस व पृथ्वी दिवस नापनापं न्ह्याये फइ ला ?

समाचार विश्लेषण

येँ (नेपालभाषा टाइम्स)- देशय् लागू जुयाच्वंगु संघीय व्यवस्थायात थौंकन्हय् वयाच्वंगु हाथ्यापाखें बचे यायेगु व ‘बडामहाराजाधिराज’ पृथ्वी नारायण शाहया बुन्हि हनेगु ज्या नापनापं न्ह्याये फइ ला ?

म्हिगः पुस २७ गते पृथ्वीनारायण शाहया बुन्हि हनेगु ज्याझ्वः झःझः धायेक न्ह्याःगु जक मखुसें उकी प्रधानमन्त्री लिसें माओवादी अध्यक्ष पुष्पकमल दाहाल, प्रमुख प्रतिपक्षी एमालेया अध्यक्ष केपी शर्मा ओलीं तकं ब्वति कयादिल ।

लुमंकेबहः जू, वंगु छुं ई न्ह्यवंनिसें प्रम दाहाल लगायत प्रमुख प्रतिपक्षी नेता ओलीं थायथासय् वनाः न्ववायेगु यानाच्वंगु दु कि देशय् संघीय व्यवस्था, गणतन्त्र व धर्म निरपेक्षताय् हाथ्या वयाच्वंगु दु, थुकियात बचे यायेगु लागिं सकलें गणतन्त्रवादीत छप्पँ जुयाः न्ह्याये माःगु दु । संघीय व्यवस्था, गणतन्त्र व धर्म निरपेक्षतायात प्यखेरं हाथ्या वयाच्वंगु कारणं उकी सकलें गम्भीर जुइमाःगु खँ कनेगु यानाच्वंगु दु ।

देशय् लागू जुयाच्वंगु संघीय व्यवस्था, गणतन्त्र व धर्म निरपेक्षतायात हाथ्या वयाच्वंगु धइगु हे थ्वहे पृथ्वी नारायण शाहया कित्तां खः । पृथ्वी नारायण शाहयात आदर्श नेता माने याइगु शक्तितय्सं देशय् गणतन्त्र, संघीयता व धर्म निरपेक्षता खारेज यायेमाः धकाः माग यानाच्वंगु दु । गणतन्त्र बचे यायेमाः धाइपिनि आदर्शपुरुष व गणतन्त्र खारेज यायेमाः धाइपिनि आदर्श पुरुष छम्ह मनू जुइ फइ ला ?

थुुगुसी पृथ्वीनारायण शाहया बुन्हि राप्रपां तःजिक हंसां नेपाल प्रज्ञा प्रतिष्ठानं धाःसा बुन्हि हनेगु ज्या मयात । न्हापा न्हापा प्रज्ञाप्रतिष्ठानं पृथ्वीनारायण शाहया किपायात बग्गीइ तयाः थ्व बुन्हि हनीगु खःसा वर्तमान नेतृत्व थ्व परम्परायात त्वाःथःगु खः ।