सचिव वल आयोग मवःनि !

न्यागू आयोगया ज्या

येँ – देय्या लिउने लानाच्वंगु समुदाययात थाय् बीगु ताः तयाः गठन याःगु न्यागू थीथी आयोगय् आः नकतिनि नियुक्त जूपिं सचिवतय् आः तत्कालया लागिं आयोगया ज्याकू तयेगु, उकिया व्यवस्थापन यायेगु व कार्यालय व्यवस्था यायेगु जिम्मा बिउगु दु । संविधानय् व्यवस्था जू कथं दलित, आदिवासी जनजाति, थारू, मधेसी आयोगया गठन थनिं स्वदँ न्ह्यः हे जुइमाःगु खः ।

तर सरकारं स्वदँ लिपा वयाः नकतिनि आयोगया ज्या यायेगु लागिं न्याम्ह सहसचिवतय्त आयोगया सचिव नियुक्त याःगु दु । तर आयोगया व्यवस्थापकीय ज्या यायेगु लागिं सचिव नियुक्त याःसां आः तक आयोग स्वयम् धाःसा गठन हे याःगु मदुनि ।

थ्व न्यागुलिं आयोगय् अध्यक्ष लगायत थीथी पदाधिकारी नियुक्त यायेगु ज्या पिनें हे यायेगु धकाः वंगु स्वला न्ह्यः सरकारं नां छ्वया हयेगु लागिं खुल्ला आह्वान याःगु खः । थ्व आह्वान यायेवं उकी इच्छुकपिं यक्वस्यां नां छ्वःगु खः । तर सरकारं उकी मध्ये ल्यया कायेगु ज्या धाःसा आः तक याःगु मदुनि ।

आयोगय् राजनीतिक नियुक्त यायेगु स्वयां सक्षम मनू नियुक्त यायेगु ताः तयाः अथे खुल्ला आह्वान याःगु खःसां नियुक्त जुइबलय् धाःसा राजनीतिक खेलया लिधंसाय् हे जुइगु टिप्पणी पिने जुयाच्वंगु दु । सरकारं यानातःगु व्यवस्था कथं प्रत्येक आयोगय् छम्ह सचिव लिसें ३० म्ह कर्मचारी दइ ।

आः सरकारं नियुक्त याःपिं सचिवतय्सं हे व्यवस्थापन याइगु खँ धाःगु दु । उकिया लागिं माःगु व्यवस्था सामान्य प्रशासन मन्त्रालयं याना बी । मन्त्रालयपाखें आः नियुक्त याःपिं न्याम्ह सचिवत मध्ये प्यम्ह ब्राम्हण जातियापिं खःसा छम्ह जक जनजातिपाखें खः । उकिं थ्व सचिव नियुक्तिया ज्या तकं समावेशी शैलीया मजुल धकाः नं आलोचना जुयाच्वंगु दु ।

न्हापा हे गठन याना तःगु महिला आयोगय् नं आः तक पदाधिकारी नियुक्त मयाःगु कारणं थ्व आयोग नं खाली जुयाच्वंगु दु । थुकिं यानाः
सरकारपाखें थुकथं अधिकार बीगु आयोगयात वेवास्ता यानाच्वंगु द्वपं नं लानाच्वंगु दु ।