‘आः स्वनिगःया भूमि सुरक्षा या, न्हूगु शहर दयेकेगु योजना बन्द या’

येँ – समाजवादी पार्टीया सहअध्यक्ष लिसें नेवाः न्ह्यलुवा सांसद भाजु राजेन्द्र श्रेष्ठं आः कोरोना महामारी लिपा स्वनिगःया जग्गाय् कृषि उत्पादन अप्वयेकेमाःगु जूगुलिं थनया खाली जग्गाय् न्हूगु शहर दयेकेगु सरकारी योजना त्वःता छ्वयेत माग यानादीगु दु ।

कोरोना महामारी लिपा आः विदेशं नं आपालं नेपाःमित लिहां वइगु सम्भावना दुगु व अज्याःगु इलय् नेपाः दुने हे स्वावलम्बन कार्यक्रमत न्ह्याकाः कृषि उत्पादन अप्वयेकेमाःगु जूगुलिं स्वनिगःया खाली जग्गा सुरक्षित याना तयेगु लागिं आः थन न्हूगु शहर निर्माणया योजना कार्यान्वयन याये मजिउगु बिचाः वयकलं न्ह्यःने हयादीगु खः ।

कोरोना महामारीलिसे ल्वायेगु लागिं वयकलं सरकारयात बियादीगु झिगू बुँदाया सुझावय् थ्व खँ न्ह्यथनातःगु दु । सांसद श्रेष्ठं म्हिगः सरकारयात थ्व झिगू बुँदाया लिखित सुझाव बियादीगु खः ।

‘विलासी जीवन त्वःते नु, सादा जीवन हने नु’ धइगु नारा समेत तयाः सांसद श्रेष्ठं बियादीगु उगु सुझावपत्रय् कोरोना महामारीं यानाः देशय् आर्थिक मन्दी ब्वलंकीगु जूगुलिं थ्वपाखें प्रभावित जुइगु उद्योग, कलकारखाना, मजदूर व गरिब जनताया लागिं विशेष व्याकेज घोषणा यायेतसमेत माग यानादीगु दु ।

अथे हे आः बजेटया निर्वाचन क्षेत्र केन्द्रित स्थानीय पूर्वाधार विकास कार्यक्रमया ध्यबा कोरोना विरुद्ध ल्वायेगु कार्यक्रमय् छ्यलेमाःगु, राष्ट्रपतिंनिसें कयाः संवैधानिक निकायया सकलें पदाधिकारीत व अधिकृत तह स्वयां च्वय्या कर्मचारीतय् पारिश्रमिक क्वपालाः कोरोना प्रतिरोध कोष बल्लाकेमाःगु सुझाव नं वयकलं बियादीगु दु । विदेशय् ज्या याः वनाच्वंपिं आपालं नेपाःमि श्रमिकत आः लिहां वयेफुगु जूगुलिं उमित व्यवस्थापन याये मफुत धाःसा देशय् सामाजिक खलल व राजनीतिक विद्रोह समेत ब्वलने फुगु जूगुलिं कृषि उत्पादन अप्वयेकेगु ज्याय् सरकारया ध्यान वनेमाःगु खँ नं धयातःगु दु ।

सरकारं लकडाउन लागू यायेवं थन हे थानाच्वंपिं श्रमिक मनूतय्त छेँय् लिहां वनेगु अवसर बीमाःगु व अथे याये मफुतले थन हे तयाः राहतया व्यवस्था याना तयेमाःगु लिसें लकडाउनं यानाः थहां वंगु बजाःभाःयात नियन्त्रण यानाः हाकुबन्जाःतयत कारवाही यायेमाःगु माग नं वयकलं यानादीगु दु ।

कोरोना संक्रमण विरुद्ध ल्वायेत दकलय् न्ह्यःने च्वनाः सक्रिय जुयाच्वंपिं डाक्टर, नर्सतय् लागिं म्होतिं नं ५० लाख तका बराबरया बीमा यायेमाःगु व थुकिया विरुद्ध संघर्ष यायेत सकलें राजनीतिक दलत दुथ्याःगु ‘सर्वपक्षीय उच्चस्तरीय समिति’ दयेकेमाःगु सुझाव नं वयकलं बियादीगु दु ।

सम्बन्धित बुखँ

LEAVE YOUR COMMENTS