‘नेकपा’ नांयात कयाः हानं विवाद

वहे नांया निगू दल दथुइ सहमति मजुइवं निर्वाचन आयोग न्ह्यचिल

येँ – देय्या दकलय् तःधंगु पार्टी लिसें आः सत्तारुढ जुयाच्वंगु दल ‘नेपाल कम्युनिष्ट पार्टी (नेकपा)’ या नां सम्बन्धी विवाद हानं दना वःगु दु ।
ऋषि कट्टेलया नेतृत्वय् दुगु ‘नेपाल कम्युनिष्ट पार्टीं’ थःगु पार्टीया नां ज्वःलाकाः केपी ओली व पुष्पकमल दाहालं बिस्कं पार्टी चायेकूगु द्वपं बिसें उगु पार्टीया नां खारेज यायेत निर्वाचन आयोगय् उजुरी बिउगु खः ।

निर्वाचन आयोगं नां सम्बन्धी थ्व विवाद समाधान याये मफयाः म्हिगः निगुलिं पार्टीया वकिलतय्त आयोगया ज्याकुथी सःताः थवंथवय् सहलह याके बिउगु खः ।आयोग स्रोतं धाः कथं निगुलिं पार्टीं वहे नां दावी यासेंलि म्हिगः आयोगं निगुलिं दलया नेता व वकिलतय्त सःताः निघौ वार्ता याके बिउगु खः । तर निगू दल दथुइ निघौ तक वार्ता यानाः नं छुं निष्कर्ष धाःसा पिहां मवल ।

ओली–दाहाल नेतृत्वय् दुगु नेपाल कम्युनिष्ट पार्टी (नेकपां) थःगु पार्टीया नांलिसे ‘नेपाल कम्युनिष्ट पार्टी’ ज्वः मलाः धइगु तर्क तयाच्वंगु दुसा ऋषि कट्टेल नेतृत्वया पार्टीं थःगु पार्टीया नां नं छोटकरीं धाइबलय् ‘नेकपा’ हे धाइगु जुयाः नां ज्वःलाः धकाः दावी याःगु खः । थःपिंसं न्हापा हे थ्व नांया पार्टी दर्ता याना तयेधुनागु जुयाः ओली–दाहालं थ्वहे नां तये मदइगु दावी उमिसं याःगु खः ।

निगू पार्टी थःथः जानाः थुकिया बारे छुं निर्णय पिमकाःगुलिं आः निर्वाचन आयोग थम्हं हे थुकिया निर्णय याये मालीगु खँ धाःगु दु । आयोग स्रोतं धाः कथं दलत थःपिंसं थुकिया बारे छुं सहमति मयाःगु कारणं आः निर्वाचन आयोगं थःपिनिगु निर्णय बी मालीगु जूगु दु । निर्वाचन आयोगय् धाःसा ऋषि कट्टेल नेतृत्व व ओली–दाहाल नेतृत्वया निगू अलग अलग हे नेपाल कम्युनिष्ट पार्टी नामं निगू पार्टी दर्ता जुयाच्वंगु दु ।

‘मखुसा अदालत वनेगु जुइ’

यदि निर्वाचन आयोगं ओली–दाहाल नेतृत्वय् दुगु ‘नेपाल कम्युनिष्ट पार्टी’ धइगु नां खारेज मयात धाःसा थःपिं अदालत वनेगु ख्याच्वः ऋषि कट्टेल नेतृत्वया नेपाल कम्युनिष्ट पार्टीं बिउगु दु । निर्वाचन आयोगय् थौंकन्हय् निगू ‘नेपाल कम्युनिष्ट पार्टी’ दर्ता जुयाच्वंगु दुसा आयोगं थ्व विवादया समाधान थःपिंसं पिकायेगु सिबें थ्वहे निगू दल जानाः पिकाःसा जिउ धइगु आशय न्ह्यःने तयाच्वंगु दु ।

कट्टेल पुचलं धाःसा ओली–दाहालवाला कम्युनिष्ट पार्टी थौंकन्हय् सरकारय् नं दुगु जुयाः निर्वाचन आयोगं थःपिनिगु पक्षय् निर्णय मयाःगु द्वपं बियाच्वंगु दु । निर्वाचन आयोगं थःपिंत पक्षपाती व्यवहार याःगु जुयाः आः थःपिं न्यायया लागिं सर्वोच्च अदालत वनेगु खँ कट्टेलया पार्टीं धाःगु दु ।

सम्बन्धित बुखँ

LEAVE YOUR COMMENTS