सक्व व ख्वपय् माधवनारायण धलं

येँ – दँय्दसं थें थुगुसी नं वंगु पुन्हिनिसें सक्व व ख्वपय् तीलमाधव नारायणया धलं शुरु जूगु दु । थ्व धलं सक्वय् शालीनदीइ च्वनीसा ख्वपय् ख्वँह्र लागाय् च्वंगु हनुमानघाटय् च्वनी । सक्वय् जुयाच्वंगु धलनय् थुगुसी २०० म्ह श्रद्धालुत अप्सं च्वनाच्वंगु दु । उकी १६ ज्वः मिजंत नं दु । सक्वया माधव नारायण द्यः थ्वहे २० गते परदेश वनेगु धकाः सक्व देशं पिने यंकीगु जूगु दु ।

वकुन्हु द्यःयात सुथय् वज्रयोगिनी यंकाः अनं तुं पशुपति यंकी । उखे ख्वपय् म्हिगः सुथय् महाद्यःथासंनिसें झिंनिम्ह मिजंत सिलामं तुलाः हनुमानघाट खुसिइ वनाः जलसमाधि काःगु खः । अन घण्टौं तक उपिं लखय् हे दुबे जुयाः जलसमाधि काःगु स्वयेत आपालं मनूत मुंगु खः ।
माघ महिनाया तसकं ख्वाउँगु इलय् तकं थःगु नांगा म्हयात लखय् थुनाः माधवनारायणया अप्सं च्वनेमाःगु थ्व कठिन ब्रत खः ।

थुगुसी झिंनिम्ह मिजं नापं खुम्ह मिस्त उगु कठिन ब्रत च्वनाच्वंगु दु । ग्वसाः खलः माधवनारायण ब्रत सेवा समितिं फोहर लःया कारणं छुं भचा ब्रतालु म्हो जूगु स्वीकार यासें सफा लः तया बिउगु जूसा ब्रत च्वनीपिं अझ अप्वइगु खँ धाःगु दु ।

ख्वप नगरपालिकां थुगुसी अन वनाच्वंगु फोहरया निकास मेगु लँपाखें बाः वनीगु व्यवस्था याःगु खः । ख्वपया हनुमानघाट ख्वँह्रेय् ब्रत च्वनीगु थ्व परम्परा सक्वय् स्वयां पुलां धइगु धापू दु । थन राजोपाध्यायपाखें हे माधवनारायणया पूजा फयेगु, द्यः बिज्याकेगु नापं द्यःयात नित्य स्नान याकीगु चलन दु ।