अमेरिकाय् चित्रकारया कविता

येँ – अमेरिकाया मिनिसोट्टाय् अमेरिकी साहित्यकारपिंसं ग्वसाः ग्वःगु छगू साहित्यिक ज्याझ्वलय् नेपालभाषाया कवि नविन चित्रकारं नं कविता पाठ यानादिल । ज्याझ्वलय् वय्कःयात नेपालं झाःम्ह विशेष पाहां धासें लसकुस नं याःगु खः । अन वय्कलं अमेरिकी चलन कथं सांगीतिक धूनया दथुइ थःगु स्वपु कविता वाचन यानादीगु खः ।

ब्रिज रिडिङ सिरिज ब्लु हार्बर सेन्टर फर द आर्टस्या ग्वसालय् जूगु ज्याझ्वलय् भाजु चित्रकार लिसें अमेरिकी कविपिं हओना सुलिभान जान्जेन, लिनेट्ट रेइनी–ग्रान्डेल, क्याथरिन केसर, इबे काबा व स्टान कुसुनोकीं नं कविता पाठ यानादीगु खः । लिसें ज्याझ्वलय् आरोन केर, सियन इगान व जोनाथन टावनसेन्डपिंसं संगीत तयेगु ज्या यानादीगु खः ।

ज्याझ्वलय् कवि चित्रकारं नेपालभाषा काव्यया संक्षिप्त इतिहास कँसें थ्व भाषायात राज्यं दमन याना तःगु जुयाः थुकिया अधिकांश रचनाय् विद्रोह खने दइ धयादिल । छुं ई न्ह्यः अमेरिकाय् हे हृदयाघात जुयाः उसाँय् मदुम्ह चित्रकारया स्वास्थ्य आः बांलाना वयाच्वंगु दु ।