गोरेयात ज्वन, थप तस्करतय् नां पोले यात

येँ – साढे ३३ किलो लुँ तस्करी प्रकरण मू आरोपी जुयाच्वंगु गोर धाइम्ह चुडामणि उप्रेतीयात प्रहरी ज्वनाः थौं सार्वजनिक याःगु दु । गोेरें लुँ तस्करीइ संलग्न मेपिं मनूतय् नां नं पोले याःगु खँ अनुसन्धान अधिकारीतय्सं धाःगु दु ।

ताःई न्ह्यवनिसें नेपालय् लुँ तस्कर यानाच्वंम्ह गोरेयात मंगलवाः न्हिनय् गृहमन्त्रालय् पत्रकारतय् न्ह्यःन सार्वजनिक याःगु खः । प्रहरीं वयात येँया गौरीघाटं ज्वनाःगु खँ धाःगु दु । तर सुत्रया कथं वयात भारतया न्हूदिल्लीं ज्वनाहःगु खः । वयात आः स्वास्थ्य परिक्षण लिपा विराटनगरय् यंकूगु दु ।

लुँ तस्करी सम्बन्धी छानविन यायेत सरकारं गठन यानातःगु अनुसन्धान टोलीयात बयान बीगु झ्वलय् गोरें तस्करीइ संलग्न मेपिनिगु नं नां पोले याःगु व आः उमिगु बारे खः मखु अनुसन्धान यायेगु खँ समितिया संयोजक ईश्वरराज पौडेलं धयादीगु दु ।
गोरें पोले याःपिनि नां सार्वजनिक धाःसा मयाःनि । संयोजक पौडेलं गोरेयात ज्वनेधुंकाः थःपिनिगु अनुसन्धान सही दिशाय् वनाच्वंगु व थुकिं अनुसन्धान ज्याय् अझ सहज यानाबिउगु प्रतिक्रिया बियादीगु दु ।

तस्करी यानाः त्रिभुवन अन्तर्राष्ट्रिय विमानस्थलं नेपाः दुत हःगु साढे ३३ किलो लुँ येँय् लुटे यायेवं गोरेया समूहं लुँ भरिया सनम शाक्ययात यातना बियाः स्याःगु खः । सनम शाक्ययात सीम्ह लुइधुंकाः न्ह्याःगु अनुसन्धानया झ्वलय् समितिं गोरेया पुचलं जक थ्यंमथ्यं प्यंगू टन लुँ तस्कर यायेधुंकूगु लुइकूगु खः । अनुसन्धानया झ्वलय् समितिं थ्वयां न्ह्यव हे ६३ म्हेसिन ज्वनेधुंकूगु दु । आः उमिगु मोरङ जिल्ला अदालतय् बयान जारी जुयाच्वंगु दु ।

समितिं थ्व लुँ काण्डय् प्रहरी एसएसपी दिवेश लोहनी, एसपी विकासराज खनाल, डिएपीत प्रजित केसी व सञ्जय राउत, सई बालकृष्ण सन्जेल, प्रहरी जवान विष्णुबहादुर खड्या व पुलांम्ह डिआइजी गोविन्दप्रसाद निरौलायात तकं ज्वनाः अदालतय् मुद्दा न्ह्याकाच्वंगु दु । थ्व काण्डय् संलग्न प्रहरी एसएसपी श्याम खत्री धाःसा फरार जुयाच्वंगु दु ।

अदालतय् बयान व बहसया झ्वलय् अभियुक्ततय् वकिलतय्सं उमित विनाकारण ज्वंगु व सरकारी अनुसन्धानकर्तातय्सं दोषी पुष्टि यायेगु गाक्क प्रमाण मदुगु धकाः जिकिर यानाच्वंगु दुसा आः गोरेयात ज्वनेधुंकाः सरकारी प्रमाण अझ बल्लाइगु खनेदुगु दु ।

सम्बन्धित बुखँ

LEAVE YOUR COMMENTS