ने. सं. ११४६ बछलाथ्व चौथी - बुंगद्यः सालिगु

ग्यास मुयाः छम्ह सित

येँ – येँया ग्वंगःबुँइ च्वंगु पिस ग्लास हाउसय् सिलिन्डर ग्याँस मुयाः छम्ह सीगु दुसा प्यम्ह घाःपाः जूगु दु । सीम्ह नुवाकोट बेलकोटया काजी तामाङ जूगु प्रहरीं जानकारी बिउगु दु । म्हिगः सुथय् ग्यास मुयाः गम्भीर घाःपा जूपिं न्याम्हेसित वासः यायेत अस्पताल यंकुगु खः । अस्पतालय् वासः यायेगु झ्वलय् तामाङ मदुगु खः ।

घटनाय् गम्भीर घाःपाः जूपिं कैलाश श्रेष्ठ, राजु बिसी, रेशम तामा व अनिल पोखरेल खःसा उमिगु अवस्था गम्भीर जुयाच्वंगु जानकारी प्रहरीं बिउगु दु । घटनास्थलय् दुपिंसं बिउगु जानकारी कथं अन बर्नर स्यनाच्वंगु छगः सिलिन्डर मर्मत यानाच्वंगु इलय् आकाझाकां मिं नःगु खः ।

अथे खःसां नं गुकथं सिलिन्डर मुल धइगु बारे प्रहरी अनुसन्धान यानाच्वंगु दु । विष्फोट जूगु न्हाय्कं कारखानाय् एलपीजी ग्यास व अक्सिजन सिलिन्डर छ्यलेगु यानाच्वंगु खः । अन अझ न्यय्गः सिलिन्डर दनिगु खँ प्रहरीं धाःगु दु ।