सरकार विरुद्ध प्रदर्शन, गगनयात हाकुगु ध्वाँय्

येँ – प्रमुख प्रतिपक्षी दल नेपाली कांग्रेसं म्हिगः येँय् सरकार विरुद्ध प्रदर्शन यात । सरकारं अधिनायकवादी चरित्र क्यंगु धासें कांग्रेसं आन्दोलनया आह्वान यासें येँय् लगायत देय्न्यंकं प्रदर्शन याःगु खः । येँया रत्नपार्कया शान्तिबाटिकां न्ह्याःगु विरोध प्रदर्शन बागबजार, पुतली सतक, प्रदर्शनीमार्ग, शहीद गेट, न्हू सतक, वीर अस्पताल जुयाः रत्नपार्कय् वयाः कोणसभाय् हिउगु खः ।

विरोध प्रदर्शनया झ्वलय् कांग्रेस कार्यकर्तातय्सं वाइडवडी विमान न्याःगु इलय् घोटाला याःगु, चिकित्सा शिक्षा विधेयक जबर्जस्ती पारित याःगु, निर्मला पन्तया हत्यारा अझ नं लुइके मफुगु द्वपं बिउगु खः ।मेखे नेपाली कांग्रेसया भातृ संगठन नेपाल विद्यार्थी संघं सांसद लिसें कांग्रेसया युवा नेता गगन थापायात हाकुगु ध्वाँय् क्यंगु दु ।

कांग्रेसं पोखराय् ग्वसाः ग्वःगु विरोध ज्याझ्वःयात सम्बोधन यायेत मञ्चय् वनेवं थापायात हाकुगु ध्वाँय् क्यंगु खः । नेविसंघं शनिवाः पोखरा महानगरपालिकाया शिक्षा महाशाखाया गाडी च्याका बिउगु खः । तर, थापां उगु ज्यायात निन्दनीय जूगु धकाः विरोध याःगु खःसा वय्कःया उगु हे धापूया विरोधय् थापायात हाकुगु ध्वाँय् क्यंगु खः ।

सम्बन्धित बुखँ

LEAVE YOUR COMMENTS