ओलीया तारिफ याये माली धकाः दाहाल भारतपाखे

येँ – नेपालय् प्रधानमन्त्री केपी ओलीया सरकारयात विपक्षीपाखें प्रहार जुयाच्वंगु इलय् नं उकिया बचाउ मयासे भारत भ्रमणय् वनाच्वंम्ह नेकपाया मेम्ह अध्यक्ष लिसें पुलांम्ह प्रधानमन्त्री पुष्पकमल दाहाल प्रचण्ड म्हिगः स्वदेश लिहां झाल ।

वय्कः भारत भ्रमणय् झायाच्वंगु हे इलय् भारतया पुलांम्ह प्रधानमन्त्री एचडी देवेगौंडा धाःसा नेपाः भ्रमणय् झायाच्वंगु खः । निगुलिं देशया पूर्व प्रधानमन्त्रीपिं थवंथवय् देय्या भ्रमण जुयाच्वंगु धाःसा अजूचायापुगु संयोग जूगु दु ।

सूत्रतय्सं धाः कथं नेकपा अध्यक्ष दाहालया थ्व भारत भ्रमण धाथें छु प्रयोजनया लागिं जूगु खः धइगु खँ धाःसा अझं स्पष्ट मजूनि । वय्कःया थ्व भ्रमणयात प्रधानमन्त्री ओली लिसें पूर्व एमालेया नेतातय्सं खास ययेकाच्वंगु मदु । अझ खास ला प्रम ओलीं थुकियात दाहालया चलाखीपूर्ण भारत यात्रा कथं थुइकाच्वंगु नं सूत्रया दावी दु ।

भाजु दाहाल सत्तारुढ पार्टीया अध्यक्ष खयां नं वय्कलं आः तक गनं नं सरकारया बखान यायेगु व सरकारया तारिफ यानाः न्वमवाःगु खँयात ओली पक्षं ‘अजूचायापुगु’ घटनाया रुपय् थुइकाच्वंगु सूत्रया दावी दु । वास्तवय् प्रम ओलीयात समर्थन यानाः ज्याखँ याना च्वने माली धकाः हे भाजु दाहाल ‘छुं ज्या मदयेक’ भारत भ्रमणय् वंगु ओली पक्षया अनुमान दु ।

भाजु दाहालं धाःसा थम्हं भारत भ्रमण वनाः प्रम ओलीं सुरु याःगु ज्यायात तिबः बीगु कुतः यानागु दावी यानादीगु दु । वय्कलं म्हिगः त्रिभुवन अन्तर्राष्ट्रिय विमानस्थलय् पत्रकारतलिसे खँ ल्हासें ओली सरकारयाके दुगु दुई तिहाइ बहुमतया सदुपयोग यायेगु लागिं थः भारत वनागु खँ कनादीगु खः ।

उखे प्रम ओलीं धाःसा दाहालयात थम्हं छुं ज्या यायेत भारत छ्वयागु वा वय्कः सरकारया ज्या यायेत भारत वंगु धकाः गनं उल्लेख तकं मयाःनिगु खँ सूत्रं धाःगु दु । नेकपाया अध्यक्ष जूसां छुं ई न्ह्यवंनिसें दाहाल मौन जुयाच्वंगु खँय् नं ओली पक्षया संशय दुगु दावी सूत्रं याःगु दु ।