ख्वप नपाया प्यक्वःगु नगर परिषद्

ख्वप – ख्वप नगरपालिकाया प्यक्वःगु नगर परिषद् ख्वप कलेज देक्वचाय् जुल । नगर परिषद्या उलेज्या नेपाल मजदुर किसान पार्टीया अध्यक्ष नारायणमान बिजुक्छेँ रोहितं यानादीगु खः ।

ज्याझ्वलय् नवासें अध्यक्ष रोहितं विश्वया थीथी पूँजीवादी देशय् गन्जागोलया स्थिति अप्वया वनाच्वंगु धासें नेपालय् नं बिमस्टेकया सम्मेलन यानाः अमेरिकाय् मुख्यालय दुगु संगठनं नेपालय् क्षेत्रीय ज्याकू स्थापना यायेगु कासाकथं हे सरकारं नं उकियात प्रश्रय बियाच्वंगु द्वपं बियादिल ।

लिसें वय्कलं प्रधानमन्त्रीया राजीनामा माग यासें उपप्रधानमन्त्रीं भारत परस्त भूमिका म्हिताच्वंगु नं द्वपं बियादिल । परिषद्या उलेज्याझ्वलय् नेमकिपाया सचिवलिसें प्रतिनिधिसभा सदस्य प्रेम सुवालं लोक सेवा आयोगयात न्हय्गुलिं प्रदेशय् थ्यंकेगुकथं सदनय् विधेयक पेश जूगु खँ न्ह्यथँसें आः विदेशय् प्रतिबन्ध तयातःगु वासः नेपालय् खुल्ला रुपं विक्री वितरण जुयाच्वंगु सीकसीकं नं सरकारं मिखा तिसिनाच्वंगु द्वपं बियादिल ।

प्रदेशसभा सदस्य सुरेन्द्रराज गोसाइँनं थःगु कमि कमजोरीयात चिइकाः ख्वप नगरपालिकां आः बांलाःगु ज्यायात ध्यानय् तयाः न्ह्याः वनेमाःगु व अज्याःगु ज्यायात निरन्तरता बिया वनेत सुझाव बियादिल । मेम्ह प्रदेशसभा सदस्य सृजना सैंजूं प्रदेशसभाया बैठकं २२ गू विधेयक पारित याःसां उकिं जनतायात छुं लबः दइमखु धयादिल ।

ख्वपया प्रमुख जिल्ला अधिकारी नारायणप्रसाद भट्टं ख्वप नगरपालिकां बजेटकथं उच्चस्तरया ज्या यानाच्वंगु धासें नगरपालिकाया ज्यायात कयाः च्वछायादिल । प्रा. डा. पुरुषोत्तमलोचन श्रेष्ठं थःपिंसं ख्वप देय्यात अझ सुदृढ, समृद्ध व नमूना पर्यटकीय स्थलया रुपय् विकास यायेकथं थीथीकथंया ऐतिहासिक व पुरातात्विक विषयया अध्ययन यानाच्वनागु जानकारी बियादिल ।

ख्वप नगरपालिकाया प्रमुख सुनील प्रजापतिं लसकुस यासें दछियंकं जूगु थीथी गतिविधिया प्रतिवेदन न्ह्यब्वयादीगु खःसा प्रमुख कार्यकारी अधिकृत रोहितराज पोखरेलं सुभाय् देछानादीगु खः। ज्याझ्वलय् ख्वप नगरपालिका वडा नं. ७या वडाअध्यक्ष उकेश कवां नं नवानादीगु खः ।

 

सम्बन्धित बुखँ

LEAVE YOUR COMMENTS