वाइड बडीं नेकपा दुने कचवं

सार्वजनिक लेखाया उपसमितिं पूर्वाग्रही रिपोर्ट बिउगु द्वपं

येँ – नेपाल वायुसेवा निगमं निगः वाइड बडी विमान न्याःगु ज्याय् भ्रष्टाचार जुल धकाः सार्वजनिक लेखा समितिया छगू उपसमितिं बिउगु प्रतिवेदनयात कयाः सत्तारुढ दल नेपाल कम्युनिस्ट पार्टी दुने समेत कचवं ब्वलंगु दु । लेखाया उप–समितिं पूर्वाग्रह तयाः अज्याःगु रिपोर्ट तयार याःगु धासें उकी स्वयम् पार्टीया छुं सांसदत तकं लगे जूगु खँ पार्टी दुने ब्वलंगु दु ।

वर्तमान पर्यटन मन्त्री रविन्द्र अधिकार खोसे जुल धाःसा थः पाः वइ धकाः पियाच्वंपिं सांसदत उकी सक्रिय जुयाच्वंगु खँ नं सूत्रं धाःगु दु । थुकिया बारे सरकारं नं छगू समिति दयेकूगु दु ।

हाखः पाकूगुलिं वैद्य माओवादी प्रति आक्रोशित
थ्वहे झ्वलय् लेखा समितिया उगु उपसमितिं याःगु कारवाहीया सिफारिसय् दुथ्याःम्ह नेपाल वायुसेवा निगमया महाप्रवन्धक सुगतरत्न कंसाकारयात म्हिगः वय्कःया हे ज्याकुथी वनाः वैद्य माओवादीया छपुचः कार्यकर्तातय्सं ख्वालय् हाखः पाकेगु ज्या यायेवं वैद्य माओवादीया उगु ज्यायात तीव्र रुपं विरोध याना हःगु दु ।

सामाजिक सञ्जालय् खास यानाः स्वनिगःया नेवाःतय्सं वैद्य माओवादीया उगु ज्या नेवाः विरोधी धासें छम्ह स्थापित व प्रतिष्ठित नेवाःया चरित्र हत्या यायेगु षडयन्त्र खः धयाहःगु दु । लेखा समितिया छगू उपसमितिं कारवाहीया सिफारिस यायेवं वय्कः दोषी ठहर जुइ मखु धासें थज्याःगु अवस्थाय् वय्कःयात दुव्र्यवहार याःगु गलत जुल धकाः यक्वस्यां थःगु धापू तया हःगु दु ।

लिसें यदि कंसाकारयात बिउगु उगु द्वपं साबित मजुल धाःसा आः हाखः पाकूपिंत छु यायेगु धकाः नं न्ह्यसः तयाहःगु दु । थ्वहे झ्वलय् भाजु कंसाकारं थःगु ज्याकुथी वःपिं छपुचः मनूतय्सं न्यागू लाख तका माल धकाः फ्वंगु व थम्हं उलिमछि ध्यबा थःके मदु धायेवं उमिसं ख्वालय् हाखः पाकाः बिसिउँ वंगु खँ कनादीगु दु ।

थ्व ज्या थः विरोधीतय्गु जुइमाः धकाः नं वय्कलं अनुमान याःगु दु ।वैद्य माओवादीया थ्व ज्यां यानाः वैद्य माओवादी नं मूलतः नेवाः विरोधी पार्टी जूगु विश्लेषण थन याना हःगु दु । सार्वजनिक लेखा समितिया छगू उपसमितिं याःगु उगु सिफारिसयात स्वयम् लेखा समितिं तकं आः तक स्वीकार याःगु मदुनि ।

सम्बन्धित बुखँ

LEAVE YOUR COMMENTS